ආයුබෝවන් අදත් Subzlk හිතවතුන් හැමදෙනෙක්ටම. වෙනද වගේම අදත් මේ එන්නෙ චිත්‍රපටයකට උපසිරැසි අරගෙනයි. ඇත්තටම කිව්වොත් මේ චිත්‍රපටය අපේ සුමින්ද සහෝදරයගේ ලැයිස්තුවෙන් තෝරාගත් තවත් චිත්‍රපටයක්. බොහොම ස්තූතියි සුමින්දට, මොකද මේක මට මග ඇරිල යන්න තිබුණ බලන්න වටින චිත්‍රපටයක්. 2017 වසරේ තිරගත වුණ මේ චිත්‍රපටය නමින් Bad Genius . මෙය තායිලන්ත චිත්‍රපටයක් වගේම සම්මානලාභී චිත්‍රපටයක්. Imdb අගය 7.8ක් ලබාගෙන Rotten Tomatos වෙතින් 92%ක
විශාල අගයක් ලබාගන්නත් සමත්වුණ චිත්‍රපටයක්. අයත් වෙන්නෙ කොමඩි, ක්‍රයිම් , ඩ්‍රාමා
ඝණයට. අධ්‍යක්ෂණය Nattawut Poonpiriya ගෙන්. දැන් අපි යමු කතාව පැත්තට…
පාසල් කාලෙදි අපිට විභාග කියන්නෙ මහ අමුතු දෙයක් නෙමෙයිනෙ, හැබැයි ඉතින් ඒවගේම ටිකක් විතර හිසරදයක්. ඒ අතරිනුත් ප්‍රධානම විභාග තමයි ශිෂ්‍යත්ව විභාගය, අපොස:සා/පෙළ සහ උ/පෙළ මේවයෙදි අපිට සෑහෙන්න පීඩනය වැඩියි, මොකද වෙනදටත් වඩා මහන්සියෙන් පාඩම් කරන්න වීමේ බරට දෙමව්පියන්ගේ හීනවල බරත් හරි හරියට එකතුවීම. ඒ අතරෙ ප්‍රධානයි හොඳ විශ්වවිද්‍යාලයකට ඇතුල්වී හොඳ අධ්‍යාපනයක් ලැබීම (නවකවදය දීම සහ පෙළපාලි යාම නෙමෙයි ) , ඊට අමතරව අධ්‍යාපනය සඳහා ශිෂ්‍යත්වයක්ලැබීම. ඔයවෙනුවෙන් අපි නොකරන දෙයක් නෑනෙ , මේ සම්බන්ධව නිර්මාණය වුණ චිත්‍රපටයක් තමයි මේ.. මේ නොකරන දේවල් අතරින් බොහොම අතලොස්සක් දෙනෙක් කරන දෙයක් තමයි විවිධ ක්‍රමවලට විභාගයන් වංචනික විදියට ලිවීම, අපේ සාමාන්‍ය ව්‍යවහාරයෙන් කිව්වොත් කොපි කිරීම වගේ දේවල් එහෙම. හැබැයි මේ චිත්‍රපටයේ කතාව ඊටත් ගොඩක් ඈතට ගිය එකක්.. .

රිනෙඩා නිතෙප් කියන්නෙ ඉතාම දක්ෂ බුද්ධිමත් ශිෂ්‍යාවක්, ඇයට ආදරයට කියන්නෙ ලින් කියලයි. ඇය 9 ශ්‍රේණිය වනතෙක් අධ්‍යයාපනය ලබපු පාසලෙන්  ඉවත්කරගෙන ඇයව උසස් (යැයි සම්මත) පාසලකට ඇතුලත් කරනවා ඇගේ පියා විසින්.කෙසේවෙතත් මේ පාසලේ ගාස්තු ඉතාම අධිකයි, ලින්ගේ අදහසක් නෑ මේ පාසලට ඇතුල්වෙන්න, ඒ තමන්ගෙ පියාට මේ වියදම දරන්න බැරි බව ඇය දන්න නිසයි. නමුත් ඇගේ දක්ෂතාවය නිසා ඇයට මේ පාසලේ නොමිලේ ( ?) අධ්‍යාපනය ලබන්න අවස්ථාවක් ලැබෙනවා. මේ පාසලේදි ඇය සම්බන්ධ වෙනවා විභාග වංචාවකට, “එච්චර දක්ෂ කෙනෙක්නම් මොකටද ඇය විභාග වංචාවකට සම්බන්ධ වෙන්නෙ?” වගේ ප්‍රශ්ණයක් දැන් ඕගොල්ලන්ගෙ හිතට එයි , ඒ ප්‍රශ්ණෙට උත්තරේ හොයාගන්න පුළුවන් චිත්‍රපටය නැරඹුවාම…ඒ වගේම මේ වංචාව ඔබ අපි කවුරුවත් නොහිතන දුරකට යනවා , එහෙනම් නරඹන්න කියල ආරාධනා කරනවා. කිසිම ගැටලුවක් නැතිව පවුලේ හැමෝම එක්ක බලන්න පුළුවන් චිත්‍රපටයක් බවත් කියන්න ඕනෙ. ඒ වගේම මේක සත්‍ය සිදුවීම් ඇසුරින් නිර්මාණය කල එකක් බවත් සඳහන් වෙනවා. එහෙනම් මං ගිහින් එන්නම් තවත් උපසිරැසියකින් හමුවෙමු.