ආයුබෝවන් අපේ කට්ටිය හැමකෙනෙක්ටම. අදත් ඔන්න ආවා තවත් සිංහල උපසිරැසියක් අරගෙන. මුලින්ම ස්තූතිවන්ත වෙන්න ඕනෙ මට මේ ෆිල්ම් එක ගැන ඊ මේල් එකක් මගින් දැනුම්දීපු හිරාන් සහෝදරයට, එයා නැත්තම් මට කවදාවත් මේක බලන්න ලැබෙන එකක් නෑ බොහෝවිට. ඉතින් හිරාන්ගේ ඒ වටිනා ඉල්ලීම ඉටුකිරීමයි මේ.

මුලින්ම කියන්නෙ ඕනෙ මේක ලංකාවේත් ප්‍රධාන ආගම් දෙකක් දෙස වෙනස් කෝණයකින් බැලීමක්. ඒ වගේම දැඩිව මතභේදයට තුඩුදිය හැකි කරුණු කාරණා ඇතුලත් මේ චිත්‍රපටයට.

මාත් පෞද්ගලිකව යම් ආගමක් අදහන, සියලු ආගම්වලට එකසේ ගරු කරන ඒවායේ ඇති ජීවිතයට වටිනා දේ ජීවිතයට එක් කරගන්න කැමති කෙනෙක් . ඒ නිසා මේක හුදෙක් පරිවර්තනයක්ම මිස මගේ මතය නොවන අතර දැඩි ආගමික මතයක නොසිට විවෘත මනසකින් චිත්‍රපටය නරඹන ලෙස නරඹන හැමෝගෙන්ම කරුණාවෙන් ඉල්ලා සිටින්නත් කැමතියි, මොකද ගොඩක් අය ආගම කියන කාරණයේදි බොහොම සංවේදී නිසා.

ඒ කොහොමවුණත් විද්‍යා ප්‍රබන්ධවලට ප්‍රිය කරන රසිකයන්ට මේක අලුත්ම අත්දැකීමක් වෙයි. ඒ වගේම මේ චිත්‍රපටය හොඳ නිදර්ශණයක් උසස් චිත්‍රපටයක් හදන්න සුන්දර ආකර්ෂණීය දර්ශන තල, පසුබිම් වගේ දේවල් ඒතරම්ම වැදගත් නොවෙන බවට. මම එහෙම කිව්වෙ මේ මුළු චිත්‍රපටයේම දර්ශණ තලය විදියට භාවිතා වෙන්නෙ නිවසක සාලයක් පමණක් නිසා. රූගත කරල තියෙන්නෙත් පැනසොනික් DVX100 කැම්කෝඩර් දෙකක් පමණක් භාවිතා කරමින්.12 angry men( 1957) බලපු අය ඉන්නවනම් මේකත් ඒ වගේම ෆිල්ම් එකක්.

වෙන වෙන කතා කිව්වට මම තාමත් චිත්‍රපටයේ නම කිව්වෙ නෑනෙ. 2007 වසරේදී ලෝකයේ වැඩියෙන්ම කතාබහට ලක්වූ චිත්‍රපටයක් ලෙසද සැලකෙන මෙය නමින් The Man from Earth (2007) නොහොත් පෘතුවියෙන් ආ මිනිසා. මෙහි අධ්‍යක්ෂණය (Richard Schenkman ) රිචඩ් ෂෙන්මන්ගෙන් . තිර රචනය ජෙරොම් බික්ස්බි (Jerome Bixby )ගෙන්, ඔහු Star Trek: The Original Series එකේ කොටස් කීපයකටම තිර රචනයෙන් දායක වුණ අයෙක්. ඔහු විතරක් නෙමෙයි තව මේ චිත්‍රපටයට සම්බන්ධ කීපදෙනෙක්ම ස්ටා-ට්‍රෙක් කතාමාලාවට විවිධාකාරයෙන් සම්බන්ධ අය. Imdb අගය ගැනත් කියන්නම ඕනනෙ, ඔවුන්ගෙන් මේ චිත්‍රපටයට හිමිවුණ අගය 7.9ක්. ඒ විතරක් නෙමෙයි Rotten Tomatoes අඩවියෙන් 85% ක අගයකුත් ගූගල් පරිශීලකයන් 95%ක අගයකුත් ලබාගන්න සමත්වුණ මේ චිත්‍රපටය සම්මාන 5ක් දිනාගන්නත් සමත්වෙලා තියනවා. මගේ නීරස ලිපිය දැන් ටිකක් දිග වැඩියි වගේ නිසා දැන් අපි යමු කතාව පැත්තට. මේ කථාවේ කතානායකයා නමින් ජෝන් ඕල්ඩ්මන්. ඔහු ඉතිහාසය සම්බන්ධ ආචාර්යවරයෙක්. ඔහු මේ වනවිට වසර 10ක් පුරා තමන් සේවය කල සරසවියෙන් ඉවත්වෙලා වෙනත් ප්‍රදේශයක පදිංචියට යන්න සූදානමින් ඉන්නෙ. නමුත් වසර 10ක් පුරා තමන් සමග එකට සේවය කල මේ මිත්‍රයට නිකම්ම යන්න දෙන්න ඔහුගේ මිතුරු මිතුරියන්ගෙ සූදානමක් නෑ. ඔවුන් තෑගිබෝග එහෙම අරගෙන එනවා ජෝන්ට සමුදෙන්න. ඒ අතරෙ අහම්බෙන් මේ උගත් මිත්‍රයො පිරිස පටන්ගන්නවා සාකච්ජාවක්. හැබැයි ටිකෙන් ටික මේ කතාව ඇදීගෙන යන්නෙ ඔවුන් සිහිනෙන්වත් නොසිතූ දිශාවකට. ඉතිරි කතාන්දරය නැරඹීම ඔයගොල්ලන්ට බාර කරමින් මම ගිහින් එන්නම්. ආයිත් දවසක තවත් උපසිරැසියකින් හමුවෙමු.

විශේෂයි :-
මේ චිත්‍රපටය කිසිදු ගැටලුවක් නැතිව පවුලේ සියලු දෙනා සමග නරඹන්න පුළුවන් .