හොංකොං සහ චීන සිනමා ද්විත්යෙහිම සුවිශේෂී මතක් සටහන් රැසක් තබමින්, එදා මෙදා තුර චීන සිනමාවේ අපරාජිත ඉහලම ආදායම් වාර්තාවට හිමිකම් කියන සිනමා සිත්තම තමයි මෙවර ඔබ වෙත රැගෙන ආවේ. පැරණි චීන සිනමා පට වලට ප්‍රිය කරන රසිකයන් කිහිප දෙනෙක්ගේ සහ විශේෂයෙන්ම ශාමල් මනෝජන් සහෝදරයගෙ කරදරේ නිසාමයි මේ චිත්‍රපටයම තෝරා ගත්තෙ. ඒ තමයි අපි කවුරුත් ප්‍රිය කරන සටන් නලු ජෙට් ලි රඟපෑ ප්‍රථම චිත්‍රපටය වන Shao Lin Si හෙවත් Shaolin Temple. මුලින්ම තිරගත වුනේ 1982 ජනවාරි 21, හොංකොං හීදි. Action, Martial Arts, Comedy, Drama යන වර්ගවලට අයිති මෙය හොංකොං – චීන සම නිෂ්පාදනයක් වෙනවා පමණක් නොව දෙරට අතර සම නිෂ්පාදනයන් අතර ප්‍රධාන ප්‍රථම චිත්‍රපටයද වෙනවා. 
1963 අප්‍රියෙල් 26 දින චීනයේ, බීජින් වලදී උපත ලැබූ ජෙට් ලි පිරිමි දරුවන් දෙදෙනෙක් සහ ගැහැණු දරුවන් දෙදෙනෙකුගෙන් යුත් පවුලක බාලයා. සිනමාවේදී භාවිතයේ පහසුව සඳහා Jet Li ලෙස වෙන කලද ඔහුගේ නියම නම Li Lianjie. ඔහුට වයස අවුරුදු දෙකේදී ඔහුගේ පියා මිය යන බැවින් බොහෝ අග හිඟකම් සහිත ජීවිතයක් ගත කිරීමට සිදුවන ජෙට් ලිගෙ ඉරණම වෙනස්වීමට මූලිකවම බලපාන්නේ වූෂූ කලාවයි. වයස අවුරුදු අටේදී වූෂූ දස්කම් පෙන්නීමට සමත්කම් දක්වන ඔහු “බීජින් වූෂූ ටීම්” එකට එකතු වන අතර අවුරුදු තුනක පුහුණුවකින් පසු ඔහු තම ප්‍රථම ජාතික වූෂූ ශූරතාවය දිනාගන්නේ වයස අවුරුදු 12 දි. ඉන් පසු 1975 සිට 1979 දක්වා පිට පිට අවුරුදු පහක් වූෂූ ජාතික ශූරයා බවට පත් වෙන ඔහු අවුරුදු 18 දී තරග වලින් ඉවත්වන්නේ දණහිස ආබාධයකට ලක්වීම නිසා. කෙසේ වෙතත් ඔහු සටන් කලාවන්ට දැක්වූ සුපිරි දක්ෂතාවය, ඔහුව සිනමා ලෝකයට ඇතුලු වීමට පාර කපන අතර, ඔහුගේ පළමු චිත්‍රපටයෙන්ම මුලු ලෝකයම තමන් වෙත හරවාගෙන, සිනමා අම්බරයේ හිනි පෙත්තටම නැගීමට මේ තරුණ ගැටයා සමත්වෙනවා. ඒ චිත්‍රපටය තමයි Shaolin Temple.
ඉතා සුවිශේෂී කාරණා කීපයක්ම නිසා මේ චිත්‍රපටය වැදගත් වෙනවා. චීනයේ නිපදවූ ප්‍රථම මාෂල් ආට් චිත්‍රපටය වන්නේද මෙයයි. ඊට පෙර මාෂල් ආට් චිත්‍රපට හැදුනේ හොංකොං වල. චීන නලු නිලියොත් බොහෝමයක්ම සහභාගි වෙලා තියෙනවා. ඒ වගේම හොංකොං හී ජනප්‍රිය වූ ප්‍රථම චීන තරුව බවට ජෙට් ලි පත්වෙන්නෙත් මේ චිත්‍රපටයේ සාර්ථකත්වය නිසා. චීනයේ ෂාඔලින් ආරාමය පසුබිම් කරගෙන තැනූ මුල්ම චිත්‍රපටය වන්නේද මෙයයි. දේශීය සහ විදේශීය ලෙස ෂාඔලින් ආරාමය ජනප්‍රිය සංචාරක ස්ථානයක් බවට පත්වීමටද ප්‍රධාන වශයෙන් බලපෑ සාධකය වන්නේද මෙම සලරුවයි. හොංකොං සහ චීන චිත්‍රපට නිපදවන්නන්ට තව තවත් ෂාඔලින් ආරාමය පසුබිම් වූ චිත්‍රපට නිර්මාණය කිරීමටද “ෂාඔලින් ටෙම්පල්” උත්තේජනයක් වුනා.

බොක්ස් ඔෆීස් වාර්තා පිට වාර්තා තැබූ ෂාඔලින් ටෙම්පල්, චීනයේදී ඇ.ඩො. 85,355,528 ක් උපයාගෙන චීන සිනමා ඉතිහාසයේ ඉහළම ආදායම් වාර්තාව පමණක් නොව, සි.ඩො.මිලියන 1.7 උපයාගෙන සිංගප්පූරුවේද එදා මෙදා තුර ඉහලම ආදායම් වාර්තාවද තම නමට ලියා ගැනීමට සමත් වුනා. 1982 වසරේ ඉහළම ආදායම් ලැබූ චිත්‍රපට අතරේ හතරවැනි ස්ථානය ලැබීමට හොංකොංහීදී සමත් වූ අතර ලැබූ ආදායම ඇ.ඩො. 2,661,911 විය. ජපානයේදීද හතරවෙනි ස්ථානයට පත්වූ අතර බොක්ස් ඔෆීස් ආදායම ඇ.ඩො. මිලියන 17.2 කි. දකුණු කොරියාවේද සාර්ථක වෙමින් ඇ.ඩො. 1,206,700 ක බොක්ස් ඔෆීස් ආදායමක් උපයාගත් අතර ඒ අනුව නැගෙනහිර ආසියාව තුල වාර්තා කල සමස්ථ ආදායම ඇ.ඩො. මිලියන 106 කි. චීනයේදී මිලියන 300 කට අධික ටිකට් ප්‍රමාණයක් විකිණී තිබූ අතර 2017 වසරේදී, සාපේක්ෂව ගණනය කල බැලූ විට එය ඇ.ඩො. බිලියන 1.45 ක ආදායමක් විය. 

IMDb අගය 6.9/10 ක්ද, Rotten Tomatoes අගය 78% ක්ද, Google සැරිසරන්නන්ගේ කැමැත්ත 84% ක්ද ලබාගෙන ඇති අතර ධාවන කාලය විනාඩි 100 කි. Jet Li සමඟ Ding Lan (පාක් වූ ෂා ) සහ Yu Hai ( මාස්ටර් ) රංගනයෙන් දායක වෙනවා. චීනයේ මධ්‍යකාලීන යුගයේ පවතින දුෂ්ට පාලනයක, කුරිරු ප්‍රාදේශිය පාලකයෙක් විසින් මරා දමන ලද තම පියාගේ මරණයට පලිගැනීම සඳහා ෂාඔලින් ආරාමයේ භික්ෂුවක් බවට පත්වී කුංෆු සටන් කලාව හදාරන, තරුණ කොලු ගැටයෙකුගේ කතාවක් තමයි චිත්‍රපටයේ ගලාගෙන යන්නෙ. සටන් වලින් නම් අඩුවක් නෑ. ඒ අතරින් කොමඩි ගතියක් සහ ආදර කතාවකුත් තියෙනවා. කිසිම අසභ්‍ය වදනක් හෝ දර්ශනයක් නොමැති බව විශේෂයෙන්ම සඳහන් කරන්න ඕනෙ.

ජය වේවා.

QUALITY – 480p – 400MB / 720p – 918MB / 1080p – 1.8GB

SUB FORMAT  –  SRT  &  IDX

♣♣  BRRip / 480p /720p / 1080p  ♣♣