The Rover (2014) Sinhala Subtitle

ආයුබෝවන්!

ලැබුවා වූ අලුත් අවුරුද්ද සුභම සුභ වේවා! කියන ගමන්ම ඔන්න තවත් උපසිරැසියක් ගෙනාවා. වෙනදා වගේම අදත් මේ උපසිරැසිය සම්බන්ධයෙන් කරපු උදව්වලට හසිත ප්‍රසාද් සහෝදරයට ස්තූතියි. මේ ෆිල්ම් එකනං ටිකක් වෙනස්ම විදිහෙ එකක්. ගොඩක් අඳුරු පැත්තකට බර, දරුණු විදිහෙ ෆිල්ම් එකක්. ඒක නිසා හැමෝටම අල්ලල යයිද කියන්න නම් දන්නෙ නෑ. හැබැයි මගේ අදහස නම් මේක බැලිය යුතුම චිත්‍රපටයක්.

චිත්‍රපටය ගැන…

2014 නිකුත් වුණු ක්‍රියාදාම, අපරාධ හා නාට්‍යමය ගණයට අයත් David Michôd විසින් අධ්‍යක්ෂණය කළ මේ ඔස්ට්‍රේලියානු චිත්‍රපටයට IMDB දර්ශකයේ 6.4ක අගයකුත්, Rotten Tomatoesහි 66%ක අගයකුත්, මෙටාක්‍රිටික්හි 64%ක අගයකුත් සහ ගූගල් පරීශීලක ප්‍රසාදය 80%කුත් හිමි වී තිබෙනවා. මෙහි එරික් ලෙස ගයි පියර්ස් (Memento, Alien:Covenant, Brimestone) සහ රේ නම් මානසිකව දුර්වල පුද්ගයලයෙකු ලෙස රොබට් පැටින්සනුත් (TENET, The Lighthouse)  රංගනයෙන් දායක වෙනවා.

ඇත්තටම මං මේ වෙනකන් බලලා තියෙන රොබට් පැටින්සන්ගෙ ෆිල්ම්වලින්, එයාගෙ හොඳම රඟපෑම දැක්කෙ මේකෙන් කියල කියන්න පුලුවන්. ඒවගේම බොහෝමයක් ප්‍රේක්ශකයොත් මේ ෆිල්ම් එකේ පැටින්සන්ගෙ ඇක්ටින් ගැන පුදුමවෙලා තියෙනවා.

කතාව…

මේ චිත්‍රපටයෙ කතාව ගොඩනැගිලා තියෙන්නෙ ලෝක ආර්ථික කඩාවැටීමෙන් වසර 10කට පසු, කාලවකවානුවක් ගැන. දැඩි හුදෙකලා පුද්ගලයෙක් වන එරික් තමන්ගේ කාර් එක හොරකම් කරපු මිනිස්සු තුන්දෙනෙක් පස්සෙන් යෑමක් තමයි මේ මුළු චිත්‍රපටයෙම තියෙන්නෙ. ඒ ලුහුබැඳීම අතරමඟදි එරික්ට හම්බෙනව තමන්ගෙ කාර් එක හොරකම් කරපු මිනිස්සුන්ගෙන් එක් අයෙකුගෙ සහෝදරයා වන, වෙඩිවැදීමකින් තුවාල වුනු “රේ”ව…

ඉතින් මේ රේ ගෙ තියෙන විශේෂත්වය මොකක්ද? එරික් ඇයි මේ විනාශවුනු ලෝකෙ පෙරලගෙන කාර් එකක් හොයන්නෙ? මොකක්ද මේ කාර් එකේ විශේෂත්වෙ? ඇයි එරික් තනියෙම ඉන්නෙ? ඇයි අර තුන්දෙනා මේ රේව දාලා ගියේ? චිත්‍රපටය බලලම දැනගන්න.

චිත්‍රපටය නැරඹීමේදි මේ කරුණු ටික මතක තියාගන්න 

• The Rover- රෝවර් කෙනෙක් කියලා කියන්නෙ ඉබාගාතේ කාලය ගත කරන, තැන තැන රස්තියාදුවෙවී ඇවිද ඇවිද ඉන්න කෙනෙකුට.

ඒ වගේම “සුරතලේට ඇති කරන බල්ලා” කියන්නත් මේ රෝවර් කියන වචනෙ යෙදෙනවා.

• Opium Den- ඔපියම් ඩෙන් එකක් කියල කියන්නෙ අබිං, කන්සා වැනි මත්ද්‍රව්‍ය විකීණීමට හෝ (ඒවා) දුම් බීම සිදුකරන ස්ථානයට. (හරියට නිකං, මත්පැන් විකුණන/භාවිත කරන තැනට "බාර්" එක කියනවා වගේ) චිත්‍රපටයේ එක තැනකදි, එරික් ඔපියම් ඩෙන් එකකට යනවා කාර් එක ගැන විස්තර හොයාගෙන. හැබැයි ඒක ඔපියම් ඩෙන් එකක් කියල චිත්‍රපටයේ කොතනකදිවත් සඳහන් වෙන්නෙ නෑ.

• Motel- මොටෙල් කියන වචනෙ හැදිලා තියෙන්නෙ "හොටෙල්" සහ "මෝටර්" කියන වචන දෙක එකතුවෙලා(මො+ටෙල්) . මොටෙල් එකක් කියල කියන්නෙ කාර් පාර්ක් එකක් එක්කම, පොඩි පොඩි කාමර පේළියක් තියෙන, දීර්ඝ ගමන්වල යෙදෙන ට්‍රක් රථ රියැදුරන් සහ වාහන වලින් ගමන් කරන සංචාරකයින් වෙනුවෙන් විශේෂයෙන්ම නිර්මාණය කරපු නවාතැනකට. මේවා හදල තියෙන්නෙ රාත්‍රියක් දෙකක් ගත කිරීමට නිසා මේවගෙ හොටෙල්වල තරම් ලොකු පහසුකම් නෑ.

• Thermionic Valves - මේකට සිංහල වචනයක් කියල මට හම්බුණේ නම් "තමයන කපාටය". කොහොමහරි මේ Thermionic Valves කියන්නෙ පැරණි ගුවන්විදුලි යන්ත්‍ර, රූපවාහිනී යන්ත්‍රවල පාවිච්චි කරපු රික්තක නළ වලට.(මුල්ම කාලෙ පරිඝනකවල පාවිච්චි කරපු රික්තක නළ (Vacuum Tubes) වගේ)

• .38 සහ 9mm- චිත්‍රපටයේදි "9mmයෙ ඒවා" සහ ".38 ඒවා" කියල හඳුන්වන්නේ, පිස්තෝල වලට භාවිත කරන උණ්ඩ සහ රිවෝල්වර් වලට භාවිත කරන උණ්ඩයි.

• Pretty Girl Rock ගීතය සහිත කොටස- අධයක්ෂකවරයා විසින් මේ චිත්‍රපටයේ, රේ Pretty Girl Rock ගීතයට සවන්දෙමින්, ගායනා කරන දර්ශනය එක්කර ඇත්තේ, රේ ශිෂ්ඨසම්පන්න, සාමාන්‍ය සමාජයක ජීවත්වුණා නම්, පොප් සංගීතයට සවන්දෙමින් කුඩා ළමයෙකු මෙන් හැසිරෙනු ඇති බව ප්‍රේක්ෂකයාට මතක් කර දීමටයි.

 

මේ චිත්‍රපටයේ සංකේතාත්මක අදහස් දෙන තැන් කීපයක්ම තිබුණත්, කතාව ස්පොයිල් වෙන නිසා, මං ඒවා හැම එකක්ම පැහැදිලිකරන්නෙ නෑ.

 

ඒ වගේම මේකෙ අසභ්‍ය වචන ගොඩක් තියෙනවා. ඒවා උපසිරැසියෙන් අයින් කළොත් චිත්‍රපටයේ රසවින්දනයට ලොකු හානියක් වෙයි කියල මට හිතුනු නිසා, ඒ වචනත් “*” ලකුණු සහිතව උපසිරැසියට යොදාගත්තා.

අවසාන වශයෙන් උපසිරැසිය පල කිරීමට අවස්ථාව ලබාදුන් Subz.lk වෙබ් අඩවියටත්, මට ලොකු සහයෝගයක් ලබාදුන් හසිත ප්‍රසාද් සහෝදරයටත් බොහොම ස්තූතියි. එහෙනම් උපසිරැසියේ අඩුපාඩු සහ චිත්‍රපටය ගැන අදහසකුත් කමෙන්ට් කරන්න කියල ඉල්ලීමක් කරන ගමන්, සමුගන්නම්.

ජය වේවා!