ආයුබෝවන්!

මුලින්ම මට ලොකු සහයක් ලබාදුන්න හසිත ප්‍රසාද් සහෝදරයව මතක් කරන්න ඕනි. හසිතගෙ ඒ උදව් නොතිබෙන්න මං මේ වැඩේ මුලදිම අතැහැරලා. මුල ඉඳලම, ඒ කියන්නෙ ගිය අවුරුද්දෙ මාර්තු මාසෙ වගේ ඉදන්ම උපසිරැසි නිර්මාණය සම්බන්ධයෙනුත්, සමහර පරිවර්තනයන් කරගැනීමටත් මට උපදෙස්/උදව් ලබාදුන්නෙ හසිත. වෙන වැඩකට යොමු කරන්න තිබ්බ කාලය, මගේ ප්‍රශ්ණවලට පිළිතුරු ලබාදීමට වෙන් කිරීම(වචන 200-300 රචනාවලිනුත් පිලිතුරු එවලා තිබුණා) ගැනත්, නෑ බෑ නොකියා උදව් කිරීමෙන්, මට මේ උපසිරැසිය නිර්මාණය කිරීමට තිබුණු උනන්දුව වැඩි කලාටත් හසිත සහෝදරයට බොහොම ස්තූතියි!

 

දැන් චිත්‍රපටය ගැන බලමු…

ජෙෆ්රි නක්මෙනොෆ්ගෙ අධ්‍යක්ෂණයෙන්, 2018දී නිකුත් වුනු මෙම චිත්‍රපටයට කියානු රීව්ස් (The Matrix, John Wick), ඇලිස් ඊව් (Before We Go), තෝමස් මිඩ්ල්ඩිච්, ජෝන් ඔර්ටීස් ඇතුළු පිරිසක් රංගනයෙන් දායක වී තිබෙනවා. ප්‍රේක්ෂකයන්ගේ මෙන්ම චිත්‍රපට විචාරකයන්ගේද අප්‍රසාදයට ලක්වුණු මේ චිත්‍රපටයට, IMDB දර්ශකයේ 5.5ක අගයකුත්, Rotten Tomatoes දර්ශකයේ 11%ක අගයකුත්, මෙටාක්‍රිටික්හි 19%ක අගයකුත් සහ ගූගල් පරීශීලක ප්‍රසාදය 79%කුත් තමයි ලැබී තිබෙන්නෙ.

මොනා වුණත් මට නම් හිතෙන්නෙ, මේක දැනටත් යම්තාක් දුරකට පරීක්ෂණ සිදුකරන විද්‍යාත්මක සංකල්පයක් ඔස්සේ ගොඩනැගුණු  සුපිරි චිත්‍රපටයක් කියලයි. මේ චිත්‍රපටයේ අසාර්ථකවීමට හේතුවත් බොහෝදුරට එම් විද්‍යාත්මක සංකල්පය පිලිබඳ බොහෝදෙනාගේ නොදැනුවත්කම වෙන්නට ඇති කියලත් මට හිතෙනවා. ඒ නිසා මං හිතුවා උපසිරැසියත් එක්කම චිත්‍රපටය නැරඹීමේදී දැනසිටිය යුතු කරුණු කීපයක් මේ ලිපියෙන් පැහැදිලි කරන්න.(හසිත ප්‍රසාද් සහෝදරයා එයාගෙ උපසිරැසිත් එක්ක ලබාදෙන ලිපිවලින් තමයි මං මේකට අදහස ගත්තෙ) කතාව ගැන කෙටියෙන්… විලියම් ෆොස්ටර් (කියානු රීව්ස්) කියන්නෙ මියයන මිනිසුන්ගේ මනස යාන්ත්‍රික ශරීරයකට හුවමාරු කර මනුෂ්‍යයින්ගේ ජීවිත දික් කිරීමට උත්සහ කෙරෙන වෛද්‍යමය ව්‍යාපෘතියක් වෙනුවෙන්ම, තම බිරිඳත් (ඇලිස් ඊව්) දරුවන් තිදෙනාත් සමඟ පුවෙටො-රිකෝවේ පදිංචියට පැමිණි දක්ෂ ස්නායු-විද්‍යාඥයෙක් (Neuroscientist). දිගින් දිගටම ව්‍යාපෘතියේ අසාර්ථකවීම් ගණනාවකට මුහුණදුන් විලියම්, සතිඅන්තයේදී තම පවුලත් සමඟ විනෝදගමනක් යන අතරතුරදී එක්තරා අවාසනාවන්ත සිද්ධියකට මුහුණපානවා… ඒ සිද්ධිය මොකක්ද? විලියම් මොනා කරයිද? අර ව්‍යාපෘතියට මොනා වෙයිද? චිත්‍රපටය නරඹලම දැනගන්න.  

තේරුම්ගැනීමේ පහසුව සඳහා චිත්‍රපටය නැරඹීමේදි මේ කරුණු ටික මතක තියාගන්න

• විඥානය- විඥානය ගැන ආගමික, දාර්ශනික වශයෙන්(ආත්මය වැනි අදහස්) හා විද්‍යාත්මක වශයෙන්ද විවිධාකාර මත රාශියක් ඇතත්, මේ කොටසින් පැහැදිලි කෙරෙන්නේ චිත්‍රපටයේ විද්‍යාත්මක පසුබිමට අදාළවන “විඥානය” පිලිබඳ මතය ගැන පමණයි.

සමහර විද්‍යාඥයන්ගේ මතයට අනුව (Consciousness) “විඥානය” හෙවත් “සිත” එහෙමත් නැත්නම් “මනස” කියලා කියන්නෙ මොළයේ ක්‍රියාකාරීත්වයේම කොටසකි. තේරුම්ගන්න පහසුවෙන්න මම ඒක මේ විදිහට පැහැදිලි කරන්නම්, විඥානය පරිගණකයක තියෙන මෘදුකාංගයක් (Software) වගේ කියල හිතන්නකො. ඉහත කී විද්‍යාඥයන්ගේ මතයට අනුව, මෘදුකාංගයක් පරිගණකයේ අංග උපාංග ක්‍රියාත්මක කරවමින්, ආදාන මෙවලම් (Input Devices) හරහා බාහිරින් ලබාගන්නා දත්ත සකසා(Process) කළමනාකරණය කරගනිමින්, අවශ්‍ය දත්ත මතකයේ තබා ගනිමින්(Save), යම් කිසි කර්තවයක්(මෘදුකාංගය නිර්මාණය කර ඇති කාර්යය) සිදු කරනවා වගේ විඥානය කියන්නෙත්, ශරීරයේ අවයවයන්, ඉන්ද්‍රියයන් හසුරුවමින්, පංචේන්ද්‍රියියන් මඟින් බාහිර පරිසරය පිලිබඳව ලබාගන්නා දත්ත සකසා කළමනාකරණය කරගනිමින්, අවශ්‍ය දත්ත මතකයේ තබාගනිමින්, යම් කිසි කර්තවයක්(මේකෙදි කර්තවය මනුෂ්‍යයාගේ පැවැත්ම) සිද්ධකරන මොළයේ එක්තරා විද්‍යුත්-රසායන ක්‍රියාවලියක් පමණයි. [Self/Less (2015), Chappie (2015), Transcendence (2014) වගේ චිත්‍රපටි ගොඩනැගෙන්නෙත් මේ මතය ඔස්සේ නිසා, ඒ චිත්‍රපට තේරුම්ගන්න අමාරු වුනු අයට දැන් ආයෙ පාරක් බලන්න පුලුවන්] • Replicas- මේක Replica කියන වචනයේ බහුවචනයයි. Replica එකක් කියල කියන්නෙ කිසියම් දෙයක සර්වසම පිටපතක් හෝ ආකෘතියකටයි. ඉතින් Replicas කියන්නෙ කිසියම් දෙයක සර්වසම පිටපත් හෝ ආකෘතීන්. • මස්තිෂ්ක බාහිකය- මොළයේ ප්‍රධාන කොටස් 3න්, විශාලම කොටස වන මස්තිෂ්කයෙහි බාහිර පෘෂ්ඨය ආශ්‍රිත කොටස වේ. මෙය “විඥානය”ත් ඇතුළුව මොළයෙන් කෙරෙන විශේෂ ක්‍රියාවලි රාශියකට මූලිකත්වය ගන්න බවට විශ්වාස කෙරේ. මස්තිෂ්ක බාහිකය හා තවත් චිත්‍රපටයේදී සඳහන් කෙරෙන මොළයේ කොටස් කීපයක් පහත රූපයේ දක්වා ඇත . • ඇල්සයිමර් රෝගය/ ඇලසයිමර්’ගේ රෝගය- “අමතකවීම” ප්‍රධාන ලක්ෂණය වන මෙම රෝගයේදි ක්‍රමක්‍රමයෙන් මොළයේ කොටස් ක්ෂය වීම සිදු වේ. තවමත් මෙම රෝගය ඇතිවීමට නිශ්චිත හේතුවක් හෝ රෝගය සුව කිරීමට නිශ්චිත ප්‍රතිකාරයක් හෝ සොයාගෙන නැත. • බීටා ඇමලොයිඩ් ප්‍රෝටීන හා නියුරෝෆිබලරි බන්ධන(බන්ධන හෝ ගැට)- මේවා ඇල්සයිමර් රෝගීන්ගේ මොළයෙන් සොයාගන්නා ලද සංඝටකයන්ය. ඇල්සයිමර් රෝගීන්ගේ අමතකවීමට මේ සංඝටක හේතු වන්නට ඇතැයි සැළකේ. • මිනිස් ක්ලෝණීකරනය සම්බන්ධයෙන් ඇති තහනම - ශාක හා සත්ත්ව, ක්ලෝනීකරණය ආශ්‍රිත ක්‍රියාවන් සදහා නීතියෙන් තහනමක් නැතත්, ඇමරිකාව විසින් ගෙන එන ලද Human Cloning Prohibition Act of 2009 පනත යටතේ මිනිස් ක්ලෝනීකරණයට අදාළ ඕනෑම ක්‍රියාවක නිරතවීම සම්පූර්ණයෙන් තහනම් කරලයි තියෙන්නෙ. ක්ලෝනීකරණය වූ මනුෂ්‍යයන් මානසිකව ගැටලුවලට ලක්විය හැකිවීම, ජාන විකෘතිතා හේතුවෙන් සෞඛ්‍ය අවදානම් සහිත මනුෂ්‍යයන් බිහිවිය හැකිවීම ඇතුළු සදාචාරාත්මක(Ethical) ගැටලු රාශියක් මෙම තහනමට හේතු වී ඇත. • ඇමයිනෝ අම්ල, පෘක්ටෝස්- ජීවි සෛල නිර්මාණය වී ඇති මූලික රසායනික සංයෝගයන්ගෙන් කීපයකි. • අනිච්ඡානුග ක්‍රියා- හෘද ස්පන්දනය, ශ්වසනය, ආහාර ජීර්ණය වැනි අපි නොදැනුවත්ම නිරන්තරයෙන් මොළය මගින් සිදුකෙරෙන ක්‍රියාවන් එහෙමත් නැත්නම්, අප සිතීමකින් තොරව කරන ක්‍රියාවන් වේ. • සායනික මිනුම්/ලක්ෂණ (Vitals)- ශරීරයේ මූලික ක්‍රියාවලියන්වල ලක්ෂණයන් වේ. බොහෝ වෛද්‍යමය කටයුතුවලදී ශරීරයේ තත්වය ගැන තක්සේරුවක් ලබාගැනීමට මේවා මනිනු ලබයි. ශරීර උෂ්ණත්වය, හෘද ස්පන්ධනය, ශ්වසනය, රුධිර පීඩනය වැනි ලක්ෂණ මෙම ලක්ෂණ/මිනුම් වලට අයත් වේ.

• Walking Pneumonia- බැක්ටීරියා හෝ වෛරසයක් හේතුවෙන් ඇතිවන, දරුණු නොවන නියුමෝනියාවකි. මෙය නිසා රෝහල්ගතවීමට හෝ විවේක ගැනීමට අවශ්‍ය නොවන අතර එදිනෙදා කටයුතු සාමාන්‍ය පරිදි කරගැනීමට පුළුවන් තරම් දරුණු නොවන්නක් නිසා, මෙම රෝගය එදිනෙදා කථාබහේදී ඇවිදින නියුමෝනියාව (Walking Pneumonia) ලෙස හැඳින්වේ.(මෙය වෛද්‍යමය නොවන වදනකි)

• ඇල්ගොරිදම- යම් කිසි පරිගණකමය ක්‍රමලේඛනයක් (Programme) මෙලෙස හැඳින්වේ. • Bunk Bed- එකක් උඩින් තවත් එකක් ලෙස, දෙදෙනෙකුට නිදාගැනීමට හැකිවන සේ සෑදූ ඇඳක්.

  එහෙනම් ඉතින් චිත්‍රපටය රසවිඳින්න. පුළුවන් තරම් වැරදිම් අඩුවෙන් කරන්න උත්සහ කළත්, මේක මගේ පළවෙනි උපසිරැසිය නිසා අඩුපාඩු ඇති. ඒවා පිළිබඳ මාව කමෙන්ට් එකකින් දැනුවත් කරන්න. ඒ වගේම Subz.lk වෙබ් අඩවියට ස්තූතියි මට මේ උපසිරැසිය පළ කරන්න අවස්ථාවක් ලබාදුන්නට! අමතක වෙමින් පවතින තවත් හොඳ චිත්‍රපටයක් සමඟ නැවත මුණගැසීමේ බලාපොරොත්තුව සමඟ සමුගන්නම්. ජය වේවා!!