ආයුබෝවන් අදත් Subzlk හිතමිතුරන් හැමදෙනෙක්ටම. අද මේ එන්නෙ පසුගිය වසරේ නිකුත්වුණ ඉතාම සංවේදී සත්‍ය සිදුවීමක් ඇසරින් නිමවුණ Gosnell: The Trial of America’s Biggest Serial Killer (2018) චිත්‍රපටයේ සිංහල උපසිරැසියත් සමගයි. මුලින්ම ස්තූතිවන්ත වෙන්න ඕනෙ මට මේ චිත්‍රපටය බාරදුන්න අපේ බොස් එහෙමත් නැත්නම් දමිත් ප්‍රියංකරට. ඇත්තටම දමිත් කියනකම්ම මම මේ චිත්‍රපටය ගැන දැනගෙන හිටියෙ නෑ. ඒ වගේම ඒ එක්කම වගේ අපේ Kantha සහෝදරයත් තවත් චිත්‍රපට පෙළක් සමග මේ චිත්‍රපටයෙ උපසිරැසියත් ඉල්ල තිබුණ. ඉතින් ස්තූතිය සමසේ බෙදෙන්න ඕනෙ ඒ දෙන්නටම. හරි අපි දැන් යමු චිත්‍රපටය පැත්තට..

මේ චිත්‍රපටය තුල කතාවට ලක්වන සිදුවීම සත්‍ය වගේම බොහොම සංවේදී මාතෘකාවක්. ඒ තමයි ගබ්සාව. අපේ රටේ ගබ්සාව නීතියෙන් තහනම් වුණත්,ගබ්සාව නීතිගත කල යුතුයි කියලත් බොහෝ අය හඬ නගනවා. පියෙක් නොමැති දරුවෙක් මේ කෲර ලෝකය ඇතුලෙ අවජාතකයෙක් ලෙස ලේබල්වන ආකාරය දැක්කම , ගබ්සාව කියන දේ ඊට වඩා මානුෂිකයි කියල පෙනුනත්, එය මෙලොව එලිය දකින්නට සිටින ජීවයක් බලහත්කාරයෙන් මේ ලෝකයෙන් ඉවත්කරදැමීමක්ය කියන දෘෂ්ටිකෝණයෙන් බැලුවොත් ගබ්සාව කියන දේ කෲර දෙයක් විදියටයි සලකන්න වෙන්නෙ. ඇමරිකාව ඇතුළු සමහර බටහිර රටවල් යම් නීති සීමාවන්ට යටත්ව ගබ්සාව නීතිගත කර තිබුණත්, එම නීතිරාමු ගබ්සාව සිදුකරගන්නා කාන්තාවගේ පැත්තෙන් ප්‍රමාණවත් මදි කියලත් කතිකාවතක් තියනව. ඒ සියල්ල චිත්‍රපටය තුල පැහැදිලිව විස්තර කෙරෙන නිසා මම ඒ ගැන ලිපියෙ සඳහන් නොකර ඉන්නම්. කොහොමහරි මේ චිත්‍රපටයට මාතෘකාවෙන පුද්ගලයා එනම් වෛද්‍ය කර්මිට් බැරන් ගොස්නෙල් මේ නීති සීමාවන් ඉක්මවා ගිහින් ගබ්සාවන් කල කෙනෙක්. බටහිර පිලඩෙල්ෆියාවල වෛද්‍ය සායනයක් පවත්වාගෙන යමින්, විශේෂයෙන්ම එම ප්‍රදේශයේ කළු ජාතික කාන්තාවන්ට තම සේවය සපයමින් සිටින ඔහුගේ සායනය ඇමරිකානු FBI සංවිධානය, අන්තරායකර ඖෂධ පාලන දෙපාර්තමේන්තුව ( DEA) සහ පිලඩෙල්ෆියා පොලීසිය එක්ව වටලනවා. වෛද්‍යවරයෙක් යන නාමයට මුවාවෙලා , වගකිවයුත්තන්ගේ නොසැලකිල්ලේද පටු අරමුණුවලද ආශීර්වාදයෙන් ඔහු කරගෙන ගොස් තිබෙන විනාශය ඔවුන් දැනගන්නෙ එතනිනුයි. සායනයෙන් සොයාගන්නා දේ සහ සේවක සාක්ෂි මත ඔහුට විරුද්ධව මනුෂ්‍ය ඝාතන චෝදනා යටතේ නඩු පැවරෙනවා. ප්‍රධාන වශයෙන්ම එම වැටලීම සහ නඩු විභාගය තමයි චිත්‍රපටය පුරාවට තියෙන්නෙ. දැන් ඔබට හිතෙන්න පුළුවන් නඩු විභාගයක්නං චිත්‍රපටයෙ බලන්න දෙයක් නැතුව ඇති කියල, නෑ ඒක එහෙම නෑ, ඔබ දැඩිව අපහසුතාවට පත්වන ආකාරයේ කිසිදු දර්ශනයක් නැතුවත් මෙය අපේ සිත් කම්පනය කරන්න පුළුවන් විදියට නිර්මාණය කරනවා, ගබ්සාව විදියට අපි එලියෙන් දකින දේ තුල සැඟව ඇති යථාර්ථය මේ චිත්‍රපටය තුලින් මනාව ප්‍රේක්ෂකයාට දක්වා තිබෙනවා. ඒ වගේම මෙහි සැබෑ සිදුවීම සම්බන්ධව අන්තර්ජාලයේ ඇති තොරතුරු බැලුවහම චිත්‍රපටය එම සිදුවීම් හැකි උපරිම ලෙස එලෙසම ඉදිරිපත් කරන්න උත්සාහ කරල තියන බව පේනව. සැබෑ සිදුවීම ගැන ලිපියට ඇතුලත් කරන්න හිතාහිටියත් එම තොරතුරු බලද්දි මට හිතුණ එහෙම නොකර චිත්‍රපටයෙන්ම ඒ කතාව නරඹන ඔබට දැනගන්න ඉඩදෙන එකයි වඩා හොඳ කියල. එසේම චිත්‍රපටය නරඹන ඔබ මතක ඇතුව අවසානය තෙක්ම නරඹන්න මොකද ක්‍රෙඩිට් අතරතුර මෙම සැබෑ වැටලීම අවස්ථාවේ ගනු ලැබූ ජායාරූප රාශියක් දකින්න පුළුවන් විස්තරද සමග. ඒ වගේම චිත්‍රපටය තුල අපට නොපෙනී ප්‍රධාන චරිතයක් වන, නඩු විභාගය තුල බේබි බෝයි A ලෙස නම්වන දරුවාගේ සැබෑ ඡායාරූපය ඔබට නරඹන්න පුළුවන් මෙම චිත්‍රපටයේ වෙබ් අඩවිය වන http://www.gosnellmovie.com වෙත පිවිසුණොත්. එය ඉතාම සංවේදී ඡායාරූපයක් බවත් මතක තබාගන්න. අඩවියේ Resources යන උප මෙනුව ක්ලික් කොට ලැබෙන වෙබ් පිටුවේ පහලටම ගිය විට ඡායාරූපයට අදාල ලින්ක් එක තියනවා Baby Boy A ලෙස නම් කරල. එහෙනම් ෆෙලිම් මැක්ලියර් ගේ Gosnell: The Untold Story of America’s Most Prolific Serial Killer නම් කෘතිය පාදක කරගෙන නික් සර්සිගේ අධ්‍යක්ෂණයෙන් නිර්මාණය වන Imdb අගය 7.0කුත්, rottentomatoes වෙතින් 57%ක අගයකුත් හිමිකරගෙන ඇති මේ චිත්‍රපටය නරඹන්න කියල ආරාධනා කරන ගමන් මම ගිහින් එන්නම්. මෙය නරඹන්න ඔබ වැය කරන පැයකුත් මිනිත්තු තිස් තුනක කාලය අපතේ නොයන බවත් වගකීමෙන් කියන්න පුළුවන්. මම ගිහින් එන්නම් හමුවෙමු තවත් උපසිරැසියකින්.

බේබි බෝයි A ගේ සැබෑ ජායාරූපය නැරඹීමට මෙතනින් පිවිසෙන්න. සංවේදී අය නැරඹීමෙන් වළකින්න.