Vivo (2021) Sinhala Subtitle

ආයුබෝවන් අදත් සබ්ස් එල් කේ හිතවතුන් හැමදෙනෙක්ටම. සෑහෙන දවසකට පසුව චිත්‍රපට උපසිරැසියක් ඔබ වෙත ගෙන ඒමටයි මේ සැරසෙන්නේ. සෝනි නිර්මාණයක් ලෙස නෙට්ෆ්ලික්ස් හරහා පසුගිය දිනෙක නිකුත්වූ වචනාර්ථයෙන්ම අපූරු ත්‍රිමාන සජීවීකරණ නිර්මාණයක් වන මෙය නමින් Vivo (2021). ප්‍රධාන වශයෙන්ම කියුබාව පසුබිම් කරගත් මෙම චිත්‍රපටය පීටර් බොසොචිනිගේ කතාවක් ඇසුරින් සිනමාවට නැගෙන්නේ කර්ක් ඩෙමිකෝ සහ බ්‍රෙන්ඩන් ජෙෆඩ්ස්ගේ අධ්‍යක්ෂණයෙන්. එසේම මෙය නෙට්ෆ්ලික්ස් හරහා නිකුත්වූ තුන්වන සෝනි ඇනිමේෂන් චිත්‍රපටය බවට පත්වනවා, ඒ The Mitchells vs the Machines (2021) සහ Wish Dragon (2021) යන චිත්‍රපට දෙකට පසුව. චිත්‍රපටයේ චරිතවලට තම හඬ දායකත්වය දක්වන්නේ ; ලින්-මැනුඑල් මිරන්ඩා (වීවෝ), යිනාලි සිමෝ (ගැබී),සෝයි සල්ඩානා( රෝසා), යුආන් ඩෙ මාකෝස් ගොන්සාලෙස් (අන්ද්‍රේස්), බ්‍රයන් ටයිරී හෙන්රි ( ඩැන්කරීනෝ), ග්ලෝරියා එස්තෙෆාන් ( මාර්තා සැන්ඩොවල්), මයිකල් රූකර් (ලුටඩෝ), නිකොල් බයර් (වැලන්ටිනා),කේටී ලෝව්ස් (බෙකී), ඔලීවියා ටෘයිලෝ (ඊවා), ලිඩ්යා යෙවෙට් (සාරා), ක්‍රිස්ටියන් ඔචෝආ(මොන්ටෝයා) ඇතුළු පිරිසක්. චිත්‍රපටයේ කතාවට මේ විදියට ආරම්භයක් අරගෙන දෙන්නම් මම...

වීවෝ යනු කියුබාවේ හවානා නගරයේ නගර චතුරස්‍රයක ගැවසෙන මිනිස්සුන්ට ගී වාදනය කරමින් රැඟුම් පාමින් දිවිගෙවන කිංකජු වර්ගයේ සතෙක්, ඔහු මේ රඟදැක්වීම් සිදුකරන්නේ ඔහුව බලාකියාගන්නා සංගීතඥයෙකු වන අන්ද්‍රේස් සමග. මේ දෙදෙනා මෙසේ සරලව චාම්ව ජීවිතය ගෙනයද්දී අන්ද්‍රේස්ට ඇමරිකාවෙන් ලියුමක් ලැබෙනවා. ඒ මේ වනවිට ඉතා ප්‍රසිද්ධ නමුත් මීට කාලයකට ඉහත අන්ද්‍රේස් හා එක්ව ගායනා ඉදිරිපත් කල මිතුරියකගෙන්, ලියුමකට වඩා එය ආරාධනාවක්.. මේ ආරාධනාව ගැන වීවෝගේ පැහැදීමක් නැතත්, අන්ද්‍රේස් තීරණය කරනවා ආරාධනාව පිලිගන්නට... එහෙත් සිදුවන්නේ කිසිවෙකුත් නොසිතූ දෙයක්. ඉන් ඉදිරියට නරඹන ඔබට බාර කරමින් මම නවතින්නම්, මනබඳින සජීවීකරණයන් සමග සුන්දර ගීත ගොන්නකින් හැඩවුණු මේ චිත්‍රපටය මගහැරනොගන්නා ලෙසත් මතක් කරමින්.

ලබාදී ඇති උපසිරැසිය අන්තර්ජාලයේ ඇති සියලුම NF(Netflix)‍WEB ඇතුළු සියලුම WEB පිටපත් සඳහා ගැලපේ.

ලබාදී ඇති උපසිරැසිය ගීත සහ ස්පාඤ්ඤ භාෂා දෙබස් සියල්ලම පරිවර්තිත සම්පූර්ණ උපසිරැසියකි.