ලැබුවා වූ නව වසර වෙනුවෙන් සියලු දෙනාටම සුබ පැතුම් එක්කරමින් මෙවර ඔබ වෙත අරන් ආවේ කාලයේ වැලි තලාවෙන් වැසීගිය තවත් මැණිකක් බඳු පරණ සිනමා පටයක්. ඒ තමයි අපි කවුරුත් දන්න සුපිරි සටන් නලු, කොමඩි කින්ග්, ජැකී චෑන්ගෙ Project A චිත්‍රපටය. මේකෙ කතාව සහ අධ්‍යක්ෂනයත් ජැකී චෑන්ගෙමයි. එදා මෙදා තුර මගේ ප්‍රියතම නලුවා තමයි ජැකී චෑන්. කොටින්ම ජැකී චෑන් පිස්සෙක් කියල කිව්වොත් හරියටම හරි. ඒ නිසා ජැකීගේ ෆිලුමකට සබ් දාන එක මගේ තිබ්බ ලොකු හීනයක්. ඉතින් ඒ හීනෙ හැබෑ කරගෙන, ජැකී චෑන්ගේ චිත්‍රපටයක රසය, subz.lk රසිකයන් වන ඔයාලත් එක්ක බෙදාහදා ගන්න මා තෝරාගත්තේ මන් බලපු ඔහුගේ දෙවන චිත්‍රපටය වූ Project A යි. මේක හොංකොං ෆිලුමක්. බෘස් ලීගෙ සහ ජැකීගෙ චිත්‍රපට බොහොමයක් නිපදවූ Golden Harvest සමාගම වෙනුවෙන් රේමන්ඩ් චව්ගේ නිෂ්පාදනයක්. මුලින්ම තිරගත වූයේ 1983 දෙසැම්බර් 22 දිනයි. Family, Adventure, Fantasy, Martial Arts, Action, Comedy ගණයට තමයි වැටෙන්නේ. IMDb අගය 7.4/10 කටද, Rotten Tomatoes අගය 83% කටද කරකවන්න සමත්වූ මේ සිනමා පටය මිනිත්තු 106 ක ධාවන කාලයක් සහිතයි. Jackie Chan සමඟ ඔහුගේ අතිජාත යාලුවන් වන Sammo Hung, Fei ලෙසද සහ Yuen Biao, Tzu ලෙසද රංගනයෙන් දායක වෙනවා. මෙහි ඇති සුවිශේෂී ලක්ෂණයක් වන්නේ එකම එක කාන්තා චරිතයක් පමණක් ඇතුලත් වීමයි. ඒ Winnie ලෙස රඟපාන Isabella Wong ය. එයද වාර්තාවෙන්නේ මුදල් ලබා නොගත් ගරු රඟපෑමක් හැටියටයි.

            මෙහි ඇති, අතෙහි යකඩ මාංචුත් දමාගෙන, සෙවණ සඳහා දමා ඇති රෙදි දෙකකුත් ඉරාගෙන, අඩි 60 ක් පමණ උස ඔර්ලෝසු කණුවක උඩ සිට බිමට වැටෙන දර්ශනය ඔහුගේ සිනමා ජීවිතයේ සුවිශේෂී අවස්ථා අතරින් එකකි. ඔහු ඒ සඳහා තමාම ඉදිරිපත් වූ අතර කිසිඳු කැමරා ප්‍රයෝගයක් භාවිතා නොකරන ලදි. එම දර්ශනය සඳහා ධෛර්යය ලබාගැනීමට ඔහුට සතියක පමණ කාලයක් ගතවූ බව කියැවේ.

         ජැකී ප්‍රථම වරට හොලිවුඩ් සිනමාවට පය තබා රඟපෑ Cannon Ball Run සහ Battle Creek Brawl චිත්‍රපට වලින් පසුව හොංකොං පැමිණ මුලින්ම රඟපෑ චිත්‍රපටය Project A වූ අතර එය හොංකොංහි පමණක් නොව නැගෙනහිර ආසියාව පුරාම බොක්ස් ඔෆීස් වාර්තා තැබීමට සමත්විය. හොංකොංහි බොක්ස් ඔෆීස් ආදායම, හොංකොං ඩොලර් 19,323,824 (ඇ.ඩො. මිලියන 2.7) විය. ජපානයේද අති සාර්ථකව තිරගත වෙමින් ඇ.ඩො. මිලියන 26.72 ක බොක්ස් ඔෆීස් ආදායමක් උපයාගත් අතර Project A, 1984 වසරේ ජපානයේ ප්‍රදර්ශනය කල විදෙස් චිත්‍රපට අතර ඉහලම ආදායම් ලැබූ චිත්‍රපට තුනෙන් එකක් විය. දකුණු කොරියාව තුලද ඇ.ඩො. මිලියන 1.5 ක බොක්ස් ඔෆීස් ආදායමක් උපයා ගනිමින් 1984 වසරේ ඉහලම ආදායම් ලද චිත්‍රපට හය අතරට එක්විය. තායිවානයේද අති සාර්ථකව තිරගත වෙමින්, නැගෙනහිර ආසියාවෙන් ආසන්න වශයෙන් ඇ.ඩො. මිලියන 31.32 ක ආදායමක් උපයාගැනීමට සමත්විය. 1985 වසරේ පැවති 4th Hongkong Film Awards හීදී හොඳම නලුවා සම්මානයට ජැකී චෑන්ගේ නමද නිර්දේශ විය. මෙම චිත්‍රපටය එහිදී Best Action Geography සම්මානය දිනාගත්තේය.

       19 වෙනි සියවසේ හොංකොං එංගලන්තයේ යටත් විජිතයක්ව පැවති කාලය පසුබිම කරගෙන තමයි මේකෙ කතාව යන්නෙ. හොංකොංවලට විශාල තර්ජනයක් වූ ලෝ කියල මිනීමරු මුහුදු මංකොල්ලකාරයෙක් ඉන්නවා. එයාගෙ කණ්ඩායම හරිම බලවත්. හොංකොංහී මුහුදු ආරක්ෂක බලකාය ලෝව අල්ලගන්න වසර ගාණක ඉඳන් උත්සාහ කරනවා. මුදල් නාස්තිවෙනවා විතරයි. කිසිම සාර්ථකත්වයක් නෑ. මේකට හොංකොං පොලීසිය බාල්දිමයි පෙරලන්නේ. මොකද මේ වියදම් නිසා එයාලට වසර ගාණකින් කිසිම ප්‍රතිපාදනයක් ලැබිලා නෑ කියලා. මේ දෙපිරිසට එකිනෙකා පෙන්නන්න බෑ. හැමතැනම වලි. දෙපැත්තේම හොඳ දක්ෂ කොල්ලො ඉන්නවා. මුහුදු බලකා කණ්ඩායමේ නායකයා ඩ්‍රැගන් (Jackie Chan) සහ පොලිස් කණ්ඩායමේ නායකයා සූ (Yuen Biao) ඒ අතර වෙනවා. හැබැයි දෙන්න නයයි පොළඟයි වගේ. මුහුදු කොල්ලකාරයෝ බෝම්බ තියලා මුහුදු බලකායේ නැව් පුපුරවා දැමීම නිසා මුහුදු බලකාය වසා දමා එයාලව පොලීසියට අනුයුක්ත කරනවා. නිකම්ම නෙමේ. සූ යටතට තමයි දාන්නෙත්. පොලිස් පුහුණුව කාලෙත් කචල්ම තමයි. ඒත් පුහුණුවෙන් පස්සෙ මෙයාලට මත් කුඩු ජාවාරම්කාරයෙක් අල්ලන්න යන මෙහෙයුමකදී මාරාන්තික සටනක් දෙන්න වෙනවා. ඒකෙන් පස්සෙ මෙයාලා අඹ යාලුවො බවට පත්වෙනවා. මේ අතර එංගලන්ත රාජකීය හමුදාවේ රියර් අද්මිරාල් සහ පිරිස මුහුදු මංකොල්ලකාර ලෝගේ හිරකාරයන් බවට පත්වෙනවා. මේක හොංකොං රජයට විශාල ප්‍රශ්නයක් වෙනවා. යම් යම් යෝජනා ආවත් අවසානයේ මුහුදු ආරක්ෂක බලකාය නැවත ස්ථාපිත කරලා, පොලීසිය හා ඒකාබද්ධව ඩ්‍රැගන්ගේ නායකත්වය යටතේ ප්‍රාණ ඇපකරුවන් බේරාගැනීමේ මෙහෙයුමක් ආරම්භ කරනවා. මේකට අහම්බෙන් එකතුවෙනවා ඩ්‍රැගන්ගෙ යාලුවෙකුත්. ලෝක හොරෙක්. ඒත් වැඩකාරයෙක්. හැබැයි අපෙත් යාලුවෙක්. ඒ තමා ෆෙයි (Sammo Hung – දන්නවනේ..හොංකොං සිනමාවේ තවත් පතාක යෝධයෙක්. මේ ෆිල්ම් එකේ ක්‍රියාදාම අධ්‍යක්ෂනයත් සැමූ තමයි)ලෝගේ තිප්පොල තියෙන්නේ ඈත මුහුදේ කිසි කෙනෙක් නොදන්න රහස් දූපතක.     

BRRip / 720p /1080p