Home Movies English Movies Spider-Man: Far from Home (2019) Sinhala Subtitle

Spider-Man: Far from Home (2019) Sinhala Subtitle

ආයුබෝවන් අදත් සබ්ස් එල් කේ හිතවතුන් හැමදෙනෙක්ටම. අද මගෙ උපසිරැසි ගමන් මගේ තවත් විශේෂ දවසක්. ඒකට හේතුව මේ මගේ 300වන උපසිරැසිය වීම. 2016 වසරේ අගභාගයේ දිනක අපේ දමිත් ප්‍රියංකර සහෝදරයාට විද්‍යුත් තැපෑල මගින් කල ඉල්ලීමකට ක්ෂණිකව ලැබුණ සුභදායී පිලිතුරත් සමගින් සබ්ස් එල් කේ අඩිවිය හා එක්ව දැන් වසර තුනක් පමණ ගතවෙලා. 50, 100, 150 ආදී වශයෙන් කඩයිම් සපුරාගෙන මේතරම් කාලයක්, දුරක් එන්නට දමිත් ප්‍රියංකර, කවීෂ, සමීර, පසිඳු ඇතුළු අපේ සහෝදර ඇඩ්මින් මඩුල්ලෙන් ලැබුණ සහාය මම පෙර කඩයිම්වලදි මතක් කලා වගේම අදත් බොහොම ආදරයෙන් මතක් කරනවා. අඩවියට පිවිසෙන ඔබ ඇසිල්ලකින් උපසිරැසියක් ලබාගත්තත්, ඔවුන් ඒ වෙනුවෙන් තිරය පිටුපස සිට, අපි කාටත් නොපෙනී ඉතාම වෙහෙසක් ගන්නවා ඔබට හැකි උපරිම සේවයක් ලබාදීම සඳහා. ඒ වගේම ඔවුන් සමග සබ්ස් එල් කේ අඩවිය අද තිබෙන තත්වයට ගෙන ඒමට දායක වූ අපගේ සහෝදර උපසිරැසි නිර්මාණකරුවන්ද, අප අඩවියෙන් උපසිරැසි ලබාගන්නා සහ අපව නිතර දිරිගන්වන අපේ රසික පිරිසත් මතක් කරනවා ආදරයෙන්. එසේම ස්තූතිය පලකලයුතුම තවත් පිරිසක් ඉන්නවා ඒ තමයි අප චිත්‍රපට පිටපත් ලබාගන්නා ටොරන්ට් අඩවි සහ සබ්සීන් වැනි ඉංග්‍රීසි ඇතුළු විදේශ භාෂා උපසිරැසි සපයන වෙබ් අඩවි. එසේම නීතියේ රැහැනට හසුවීමේ අවධානමද තබාගෙන (ඔබ දකින්නට ඇති දැන් සතියක පමණ සිට MKVCAGE වෙබ් අඩවිය වසා දමා ඇති බව. ඊට හේතුව Hellboy චිත්‍රපටයේ නිර්මාණකරුවන් එයට නඩු පැවරීම), තම කාලය ශ්‍රමය සහ ධනයද වැයකරමින් වීඩියෝ පිටපත් එක් කරන්නන් සහ උපසිරැසි නිර්මාණකරනයෙන් දායක වන්නන්. ඒ සියලු දෙනාටද අපි අපේ කෘතඥභාවය පළකල යුතුමයි.

කොහොමින්හරි නැවතත් මගේ පැත්තට කතාව අරගෙන ආවොත්, 250 වන උපසිරැසියේ සිට 300 දක්වා එන්නට මට වෙනදාට වඩා සෑහෙන කාලයක් ගිහින්. ඒකට ප්‍රධානම හේතුව රැකියාවෙ කටයුතුත්, පෞද්ගලික ජීවිතයෙ කටයුතුත් සමග උපසිරැසියකට කාලය සොයාගන්නට ඉතාම අසීරුවීම. ඒ නිසා ලැබෙන කාලයත් තෝරාගත් චිත්‍රපටයක් නරඹන්න යෙදෙව්වට පස්සෙ ඊට උපසිරැසි කිරීමේ ආශාව පැත්තකින් තියන්න වෙනවා කණගාටුවෙන් වුණත්. සිතා සිටියාට වඩා ලියවිලා වගේ පේන නිසා මම මගේ කතාව මෙතනින් නවත්වන්නම්. නැවත වතාවක් බොහොමත්ම ස්තූතියි සියලු දෙනාටම. සඳහන් කිරීමට අමතකවූ යම් අයෙක් සිටිනවානම් සමාවෙන්න.‍

එහෙනම් මගේ 300 වැනි උපසිරැසිය විදියට මේ අරගෙන එන්නෙ මේ වසරේ මාවල් රසිකයන් නොඉවසිල්ලෙන් පෙරමග බලා සිටි තවත් චිත්‍රපටයක්. මේ තමයි Spider Man: Far From Home (2019) චිත්‍රපටයේ සිංහල උපසිරැසිය. මාගේ කඩයිම වෙනුවෙන් මේ චිත්‍රපටය වෙන්කර දුන් කවීෂ සහෝදරයා ඇතුළු ඇඩ්මින් මඩුල්ලට මාගේ ස්තූතිය මුලින්ම. ඇත්තටම මේක බාරගත්තෙ HD පිටපත් ආව දවස්වල වුණත් ටිකක් ප්‍රමාද වුණා මම බලාපොරොත්තු වුණාට වඩා. මාවල් සිනමා විශ්වයේ 23වන සිනමා නිර්මාණය ලෙස එලිදකින මේ Spider Man: Far From Home අධ්‍යක්ෂණය ජොන් වොට්ස්ගෙන්. රචනය නැසීගිය ස්ටෑන් ලී, ස්ටීව් ඩිට්කෝ ඇතුළුව ක්‍රිස් මැකෙනා සහ එරික් සොමර්ස් එකතුවෙන්. මේ වනවිට 7.8ක IMDB අගයක්ද, 90%ක Rotten Tomatoes අගයක්ද, 94%ක ගූගල් පරිශීලක ප්‍රසාදයක්ද දිනාගෙන ඇති මේ චිත්‍රපටය තුලින් ඔබට අතරමග නැවතුණු සෑම් රයිමිගේ Spider man 4 තුලින් පැමිණීමට නියමිතව සිටි ක්වින්ටන් බෙක් නොහොත් මිස්ටීරියෝ චරිතය පලමුවරට දැකගත හැකියි ජේක් ග්ලෙන්හෝල් රංගන ශිල්පියාගේ රංගන දායකත්වයෙන්.

ඊට අමතරව සුපුරුදු පරිදි ස්පයිඩර් මෑන්/පීටර් පාකර් ලෙස ටොම් හොලන්ඩර් සහ ඔහුගේ පෙම්වතිය එම්.ජේ (මිෂෙල් ජෝන්ස් ) ලෙස සෙන්ඩායාත් එකතුවද්දී, අනෙකුත් චරිතවලින් සැමුවෙල් එල් ජැක්සන් (නික් ෆියුරි), ජේක් ග්ලෙන්හෝල් (මිස්ටීරියෝ/ක්වින්ටන් බෙක්), මරිසා ටොමේ (මෙයි පාකර්), ජොන් ෆෙව්රෝ (හැපී හෝගන්), ජේකබ් බැටලන් (නෙඩ්), ටෝනි රෙවොලොරි (ෆ්ලෑෂ් තොම්ප්සන්), කෝබි ස්මල්ඩර්ස් (මරියා හිල්) ඇතුළු පිරිසක් එකතුවෙනවා. සම්මාන 13කට නිර්දේශව එයින් පහක් දිනාගැනීමට මේ වනවිට මේ සිනමා නිර්මාණය සමත්ව තිබෙන බවත් මතක් කරන්න ඕනෙ. දැන් අපිට තිබෙන්නේ චිත්‍රපටයෙ කතාවට ප්‍රවේශ වීමට නිසා මුලින්ම කියන්න ඕනෙ මූලික වශයෙන්ම Spider Man: Homecoming (2017), Avengers: Infinity War (2018) සහ Avengers: Endgame (2019) චිත්‍රපට ත්‍රිත්වය නරඹා නැති අයෙක්නම්, ලිපිය මින් ඉදිරියට කියවීම ඔබේ රසවින්දනයට බාධාවක් විය හැකි බව සහ අවම වශයෙන් එම චිත්‍රපට ත්‍රිත්වයවත් නරඹා මෙය නරඹන ලෙස.

ස්පයිඩර් මෑන් කිව්වම අපි ස්පයිඩර් මෑන්ව විවිධාකාරයෙන් දුටුවා සිනමාව තුලින්. එයින් බොහෝදුරට ජනප්‍රියත්වයක් දිනාගත්තේ ටෝබි මැග්වයර් රංගනයෙන් දායක වූ ස්පයිඩර් මෑන්. ඉන්පසුව අපි ඇන්ඩෲ ගාෆීල්ඩ් රංගනයෙන් දායකවු Amazing Spider Man චිත්‍රපට නැරඹුවා (මම දකින විදියට ඇන්ඩෲ ගාෆීල්ඩ් නම් දක්ෂ රංගශිල්පියාටත් ස්පයිඩර් මෑන් චරිතයටත් දෙකටම එයින් වූයේ අසාධාරණයක්). කෙසේ හෝ මේ දෙදෙනාටම වඩා ජනප්‍රියත්වයක් අත්කරගන්නේ ඉන්පසුව (මේ චිත්‍රපටයේත් ඇතුළුව) පීටර් පාකර්/ස්පයිඩර් මෑන් චරිතයට පණපොවන ටොම් හොලන්ඩ්. පීටර් පාකර්ටම ගැලපෙන ඔහුගේ වයස, පෙනුම සහ හාස්‍ය නැඹුරුව ඊට සෑහෙන්න හේතුවුණා.

  • වමේ සිට : ටෝබි මැග්වයර්, ඇන්ඩෲ ගාෆීල්ඩ් සහ ටොම් හොලන්ඩ්.

ඉන්පසුව පසුගිය දවසක අපි සෝනි සමාගම වෙතින්ම එලිදැක්වූ අප්‍රිකානු ඇමරිකානු- ලතින් සම්භවයක් සහිත මයිල්ස් මොරාලස් චරිතය ස්පයිඩර් බහු විශ්වය වෙත එක්වීම දුටුවා…

ඇත්තටම මේ ස්පයිඩර්-වර්ස් එක නොහොත් ස්පයිඩර් බහු විශ්වය අපිට හඳුන්වා දෙන්නෙ මෙතනින් කිව්වොත් හරි. ඒ Spider Man : Into Spider Verse (2018) නමින්. එය සහතිකවම නූතන සජීවීකරණ සිනමාවේ විශිෂ්ඨ මට්ටමේ නිර්මාණයක් බව අවිවාදයෙන්ම පිලිගන්නවා නැරඹූ ඕනෙම අයෙක්. අපි එතනින් නැවතත් පීටර් පාකර් ස්පයිඩර් මෑන් පැත්තට ආවොත්, අපි ඔහුවත් පසුගිය සමයේ නිතරම දැක්කා, මුලින්ම Captain America: Civil War (2016) තුලින්. නැවතත් නරඹනවානම් මෙන්න ඒ අවස්ථාව. මෙන්න මෙහෙමයි ටෝනි ස්ටාක් මුලින්ම පීටර්ව මුණගැහෙන්නෙ. එයින් පසුව ඔහුටම වෙන්වූ චිත්‍රපටයක් (Solo) ලැබෙනවා Spiderman:Homecoming (2017) ලෙස. ඒ අනුව මේ Far From Home (2019) ඔහුටම වෙන්වූ දෙවන චිත්‍රපටය, මම කිව්වෙ ටොම් හොලන්ඩ් ස්පයිඩර් මෑන්ට. ඇවෙන්ජර්ස්ලා හා එක්ව වැඩකරන්නට ලැබීමෙ ප්‍රීතියෙන් පිනාගොස් සිටින පීටර් පාකර් නැවතත් තම ගමරටබලා, එනම් ක්වීන්ස් වෙත, එන ආකාරය සහ එයින් පසුව සිදුවීම් තමයි අපි Homecoming චිත්‍රපටයෙන් දැක්කෙ. ස්වභාවයෙන්ම අහංකාර, දරදඬු ටෝනි ස්ටාක් හා පීටර් පාකර් අතර  පිය-පුතු ආකාරයේ බැඳීමක්-පීටර්ගෙ පැත්තෙන්- ඇතිවෙනවාත් අපි දැක්කා. හැබැයි පොතේ හැටියට ඒ කිව්වෙ ටෙක්නිකලි ගත්තොත් මෙය ගුරු-ගෝල සම්බන්ධයක්. මතකය අලුත් කරගන්න අවශ්‍යනම් මෙන්න එවන් අවස්ථාවක්. ඊටපසුව ඉතිං අපි දකින්නෙ එම්.ජේ ට හිත ගිය පීටර් පාකර්ව. එම් .ජේ කිව්වෙ මේරි ජේන් එහෙම නෙමෙයි මිෂෙල් ජෝන්ස් බවත් මතක තියාගන්න. මේ Homecomingහි එම්.ජේ-පීටර් දර්ශන එකතුකර සෑදූ රසික වීඩියෝවක්.

ඊලඟට අපි ස්පයිඩර් මෑන්ව දකිනවා Avengers:Infinity War (2018) තුලින්. ඒත් තානෝස්ගෙ ස්නැප් එකට ගොදුරුවන ඇවෙන්ජර්ස් ගොඩට ඔහුත් අයත් වෙනවා අවසානයේ, ඔහු සහ ටෝනි ස්ටාක් අතර තිබුණ සමීප නොවන නමුත් දැඩි බැඳීම අපට වඩාත් දැක්වූ මේ අවස්ථාව  චිත්‍රපටය නැරඹූ අයගෙ සිත් සසල කල අවස්ථාවක්. නැවතත් මතකය අලුත් කරගන්න අවශ්‍යනම් මේ එම අවස්ථාව. ඉන්පසුව නැවතත් අපිට ඔහුව හමුවන්නෙ ඇවෙන්ජර්ස්වරුන්ගේ වීර වික්‍රමය නිසා නැවතත් මෙලොවට ආ පීටර් පාකර් ලෙස. ඒත් ඇවෙන්ජර්ස්වරුන් කීපදෙනෙකුගේම ජීවිතය අවසාන වන මේ චිත්‍රපටය තුලදි අවාසනාවන්ත ලෙස ලෝකයට – වැඩිපුරම පීටර්ට-ටෝනි ස්ටාක් අහිමි වෙනවා. මේ එම අවස්ථාව. එතකොට Avengers: Endgame (2019) සිදුවීම්වලින් පසු ලෝකයේ තත්වය අපිට මුලින්ම දකින්න ලැබෙන සිනමාපටය තමයි මේ Far from Home. මෙහි එන්නේ Endgame සිදුවීම්වලින් මාස අටකට පසු සිදුවීම්. දැන් මෙතනත් තියනවා ප්‍රශ්ණයක්. ඒ තමයි හල්ක්ගේ ස්නැප් එකෙන් (මෙම චිත්‍රපටය තුලදී එය හඳුන්වන්නෙ ‘බ්ලිප්’ ලෙස) නැවත මෙලොවට ගෙන ආ අය ස්නැප්වීමට ගොදුරුනොවූ අයට වඩා වසර පහකින් වයසින් අඩුවීම. ඒ කියන්නෙ ඔවුන් ස්නැප්ව යද්දී සිටි වයසේමයි. හිතාගන්න පුළුවන්නෙ වෙලා තියන දේ. සිදුවූ සියල්ලත් සමග ඇවෙන්ජර්ස් කණ්ඩායම සීසීකඩව තිබීම නිසා ලෝකයට සිටින එකම ආරක්ෂකයා මේ වයස 16ක්වූ දඟකාර, බරක් පතලක් නැති ස්පයිඩර් මෑන් පමණයි. තමන්ට පියෙක් මෙන්වූ  ටෝනිගේ සහයද රහිතව, ඔහු විසින් ලබාදුන් අයන්-ස්පයිඩර් සන්නාහය පමණක් ඇතිව, තම සිතගත් එම්.ජේ සමග පාසල් විනෝද චාරිකාවක් යාමට පුල පුලා බලාසිටින පීටර් පාකර්ට නිදහසේ ඒ ගමන ගොස් ආපසු ඒමට ලැබෙයිද? නෑ. ගමන අතරතුර මෙවර ඔහුට මුහුණ දෙන්න වෙනවා ඉතාම බලවත් සතුරෙකුට…. නෑ, සතුරන් කණ්ඩායමකින් කීපදෙනෙකුට. ස්වභාව ධර්මයේ ප්‍රධාන බලවේග, එනම් මහපොළව, වාතය, ජලය සහ ගින්න-එක්කරගත් ELEMENTALS (මූලද්‍රව්‍යවාදීන්) නම් කණ්ඩායමක් වන ඔවුන් පිළිවෙලින් සෑන්ඩ්මෑන්, සයික්ලෝන්, හයිඩ්‍රෝ-මෑන්, මෝල්ටන් මෑන් ලෙසයි. අවසානයේ මේ සියල්ලේ එකතුවකුත් ඔබට දකින්නට පුළුවන් ෆියුෂන් ලෙස. ඔවුන් සමග සටනෙදි ස්පයිඩර් මෑන්ට එකතුවෙනවා තවත් අයෙක්. ඒ තමයි මම පෙර සඳහන් කල ක්වින්ටන් බෙක් නොහොත් මිස්ටීරියෝ.

කොමික්වලදී ඔහු රැවටිල්ලට සහ දෘෂ්ටිමායාවන්ට අධිපති ලෙසයි හැඳින්වෙන්නේ. එසේම කොමික්වලදී ඔහු පසුකලෙක සුපිරිබලයන් ලැබුණු, දෘෂ්‍යප්‍රයෝග අංශයෙන් අති දක්ෂයෙක් මෙන්ම පසුව නළුවෙක් වීමට සිහින මවා එය අසාර්ථක කරගත් අයෙක්.

එහෙනම් ඒ ඇතිනෙ මේ චිත්‍රපටයට ප්‍රවේශයක් ගන්න. මෙහි ක්‍රෙඩිට් දර්ශන ද්විත්වයක්ද ඇතුලත් බැවින් මතක ඇතුව ඒ සියල්ලත් නරඹන්න. එතකොට ඔබට වැටහේවි යම් යම් හිස්තැන් සහිතව වුණත් මෙය අංගසම්පූර්ණ ස්පයිඩර් මෑන් චිත්‍රපටයක් බව. එසේම මාවල් සිනමා විශ්වයේ තෙවන අදියර මේ සමගින් නිමාව දකිනවා. ඒ නිසාම තවත් වසරක පමණ කාලයක් මාවල් චිත්‍රපටයක් අප හමුවට එන එකක් නෑ. එහෙනම් මම ගිහින් එන්නම්, හමුවෙමු තවත් උපසිරැසියකින්.

“Uneasy Lies The Head That Wears a Crown”

උපසිරැසිය BluRay පිටපත් සඳහා වන අතර, WEB-DL පිටපත් සතු අයගේ පහසුව තකා එම පිටපත්වලට ගැලපෙන ලෙස සකස්කල උපසිරැසියක්ද, උපසිරැසි ගොණුව තුල ඇතුලත්ය. එය පෙර නිකුත්වූ INTERNAL (Leaked) WEBrip පිටපත්වලට නොගැලපෙන බවද කරුණාවෙන් සලකන්න.

විශේෂ :-

  • පීටර් විනෝද චාරිකාවට ගෙනයාමට ගන්නා සූට්කේසයේ “BFP” ලෙස සඳහන්කර තිබෙනු ඔබට දකින්නට හැකිවේවි. එනම් බෙන්ජමින් ෆ්‍රෑන්ක්ලින් පාකර් යන්නේ කෙටි කිරීමයි. ඔබ දන්නවා ඒ තමයි පීටර්ගෙ මියගිය මාමාගේ නම.

  • ස්ටෑන් ලී මහතාගේ කැමියෝ එකක් නොමැති මාවල් සිනමා විශ්වයේ ප්‍රථම චිත්‍රපටය මෙයයි.
  • චිත්‍රපටයේ එක් තැනක ඔබට පීටර් තැඹිලි පැහැ ඇඳුමකින් සැරසී සිටිනවා දකින්නට ලැබෙයි තවත් පිරිසක් සමග. එම ඇඳුම රාජකීය නෙදර්ලන්ත පාපන්දු සංගමයයෙන් නිකුත්කල නිල පාපන්දු නිල ඇඳුම. චිත්‍රපටයේ එතැන සිදුවීම වඩාත් වටහාගන්න පහසුවෙයි මෙය මතකයේ තබාගත්තම.
  • මෙය ඩොලර් බිලියනයේ ආදායම් සීමාව ඉක්මවා ගිය පලමු ස්පයිඩර් මෑන් චිත්‍රපටයද වේ.
  • මෙහි පීටර් විසින් බ්ලැක් ඩාලියා මිනීමැරුම ලෙස හඳුන්වන්නේ 1947 වසරේ ඇමරිකාවේ ලොස් ඇන්ජලීස්හි ප්‍රසිද්ධම නොවිසඳුණු ඝාතනවලින් එකක්ද වන “බ්ලැක් ඩාලියා” මිනීමැරුමයි.

Peter Parker’s relaxing European vacation takes an unexpected turn when Nick Fury shows up in his hotel room to recruit him for a mission. The world is in danger as four massive elemental creatures — each representing Earth, air, water and fire — emerge from a hole torn in the universe. Parker soon finds himself donning the Spider-Man suit to help Fury and fellow superhero Mysterio stop the evil entities from wreaking havoc across the continent.

  • Details
  • Trailer
  • Download links

Year : 2019

Rating : 7.9

Genre : Action, Adventure, Sci-Fi

Actors : Tom Holland, Samuel L. Jackson, Jake Gyllenhaal, Marisa Tomei

Writer : N/A

Director : Jon Watts

Plot :

Following the events of Avengers: Endgame (2019), Spider-Man must step up to take on new threats in a world that has changed forever.

BRRip

BRRip සඳහා වේ



සිංහල උපසිරැස Download කරගන්න 13107 times


Hasitha Prasad

Subz LK වෙබ් අඩවිය වෙනුවෙන් Hasitha Prasad කල උපසිරැසි නිර්මාණයකි


මේවත් බලන්න

Vampire Knight (2008) [S01 : E04] Sinhala Subtitle

පෙර කතාංගයන් නැරැඹූ සියල්ලන්ටම ස්තූතියි. යුකී දැනගත්තා පෙර කතාවෙදි සීරෝ කියන්නෙ වැම්පයර් කෙනෙක් කියලා. වැම්පයර් …

subzlk stop Comment කිරීමට පෙර මේ ලිපිය කියවන්න: මේ ලිපිය කියවන්න

35 comments
  1. මුලින්ම 300 වෙනි උපසිරැසි නිර්මාණයට සුභ පතලම ඉන්නම්කෝ. කලිං කඩයිම් වලදි කියන්න ඕන දේවල් ඔක්කොම කියුව නිසා දැන් කියන්න දේවල් නැති තරම්. අප් වෙබ් අඩවියේ මෙතරම් ලොකු උපසිරැසි ප්‍රමාණයක් කල උපසිරැසි කරුවා ඉතිං හසිත අයියා තමා. ඇත්තටම පෞද්ගලික වැඩත් එක්ක උපසිරැසි කරන්න කාලේ වෙන් කරගන්න කොච්චරම අමාරුද කියලා අපි දන්නවා. ගොඩක් කැප කිරීම් කරන්න වෙනවා. ඒත් ඉතිං උපසිරැසි කලාවෙන් ඉවත් වෙන්න එපා කියලා ආදරයෙන් ඉල්ලන්වා. පුළුවන් විදිහට උපසිරැසියක් කරගෙන අපිත් එක්කම ඉන්න කියල ඉල්ලනවා. ඉතිං අර කතාවකුත් තියෙන්නේ “ආ මග කෙටී, යා යුතු මග දුරයි” කියලා. ඉතිං ඒ කතාව පෙරදැරිව මෙතැනින් නොනැවතී තවත් ඉදිරියට යන්න කියලා ඉල්ලනවා. ඒ වගේම ඉදිරි කඩයිම් වලට යන්න අවශ්‍ය ශක්තිය දෛර්‍ය ලැබෙන්න කියලත් එක හිතින් ප්‍රාර්ථනා කරන ගමන් අයියගෙ සියළුම පෞද්ගලික හා රාජකාරි කටයුතු වලටත් සුභ පතනවා.එහෙනම් ඉතිං 300 වෙනි උපසිරැසි නිර්මාණයට නැවතත් සුභ පතනවා. ඔබට තුතී. ඔබට ජය! ❤️

    • Hasitha Prasad

      බොහොම ස්තූතියි, කවීෂ උපසිරැසි කිරීම නවත්තන්න අදහසක් නෑ, කවීෂ, කාලය සම්බන්ධ ගැටලුව විතරයි තියෙන්නෙ. පුළුවන් විදියට කොහොමහරි උපසිරැසි ගේනවා ඉදිරියටත්. බොහොම ස්තූතියි ප්‍රතිචාරයට වගේම හැමදාමත් ලබාදෙන සහයෝගයට.

  2. 300 වැනි උපසිරැසි නිර්මාණයට උණුසුම් සුබ පැතුම් හසිත සහෝ ❤️

  3. Thamod Godakanda

    300වැනි උපසිරැසි නිර්මාණයට හදවතින්ම සුබ පතනවා.ඒවගේම සබ්ස් එල් කේ සයිට් එකේ වැඩිම උපසිරැසි ගණනාවකට හිමිකරුවා අපේ හසිත අයියා.ඉතින් වැඩ රාජකාරි අස්සේ කිසිම මුදල් අපේක්ෂාවක් නැතුව තම කාලය ශ්‍රමය කැපකරලා තමා මේ සත්කාරය කරනවා කියන කොට හසිත අයියා කොහොම මේ තරම් ලොකු ගමනක් ආවද කියලා හිතාගන්නත් අමාරුයි.ඉතින් මේ විදියට නොනවත්වා 350,400,450,500 වැනි තව තව කඩයිම් සාර්තක කරගන්න හැකිවේවා කියලා හදවතින්ම සුබ පතනවා.ඒවගේම සබ් එකටත් තැන්ක්ස්.ෆිල්ම් එකනම් බලලා තියෙන්නේ,හසිත අයියගේ සබ් එක දාන් ආයෙත් බලනෝ.ඉතින් නැවතත් 300වැනි උපසිරැසි නිර්මාණයට සුබ පතනවා! ජය වේවා!

  4. සහන් සුලක්ඛණ

    හම්මෝ මේ sub එක එනකම් මඟ බලාගෙන හිටියේ. අනිවා හසිත සහෝ කරනවා කියලා දන්න නිසාම ෆිල්ම් එක දිහා ඇහැක් ඇරලා බැලුවේ නැහැ, ඒ වගේම කියන්න ඕනේ 300 වෙනි උපසිරසියට සුබ පැතුම් කියලා. අපේ site එකේ ඉන්න දැනට වේගවත්ම සහ හරිම නිහතමානී හොඳම උපසිරසි කරුවා කියලා හඳුන්වුවොත් මම හිතන්නේ මම වැරදි නැහැ කියලා. ඒක අපිට හොඳටම බලා ගන්න පුළුවන් කට්ටිය බැනලා දාපු සමහර comment වලට අපේ හසිත සහෝ දීපු පිළිතුරු වලින්ම. නොමිලයේ කරන මේ සමාජ සේවය වෙනුවෙන් comment එකක් දා ගෙන යන ඉතාමත් හොඳ සුහද ප්‍රමාණයෙන් අඩු සීමිත පිරිසක් නිසා තමයි අද මෙහෙමවත් sub කරන අය sub කරන්නේ, මොකද ඉස්සර තරම් දැන් එච්චර කට්ටියක් අපිත් එක්ක නැති නිසාම වෙන්න ඇති. හසිත අයියාගේ sub වල තියන කොලිටි එක ආයේ ලංකාවේ කිසිම කෙනෙක්ගේ ගාව නැහැ කියලා අනිවා කියන්න පුළුවන්. ඉතින් සහෝදරයා, වේලාවක් ලැබෙන වෙලාවේ හෝ sub එකක් කරලා මේ සබ්ස් එල්කේ පවුලත් එක්ක හැමදාමත් මේ වගේ ඉඳලා ඉදිරි උපසිරසි කඩයිම් පවා පාස් කරන්න ශක්තිය ලැබේවා කියලා පතනවා, ඒ වගේම නිවසේ ඉන්න හැමෝටම මේ ඔයා කරනා වූ සමාජ සත්කාරය නිසා පිනක්ම සිද්ද වේවා කියලා හදවතින්ම ප්‍රර්ථනා කරන ගමන් ඔයාට නවත්ත ඉදිරි අනාගතයට ජය වේවා කියලා පතනවා අයියේ!

  5. Kantha_DLA

    300 වෙනි උපසිරසියට හදවතින්ම සුභ පතනවා…!!!

    … ගොඩක්ම ස්තූතියි. …
    ඔබට සහ ඔබ පවුලේ සැමට
    තෙරුවන් සරණ ලැබේවා..!

  6. ප්‍රථමයෙන්ම වෙනදා වගේම ආදරෙන්,හදවතින්ම සුබ පතනවා 300 වෙනි කඩඉමත් මේ විදියට ජයග්‍රාහී ලෙස සම්පූර්ණ කිරීමට.
    මම හැමදාමත් කියනවා වගේ හසිත ප්‍රසාද් සහෝදරයා කියන්නේ උපසිරැසි කරුවෙකුට එහා ගිය කෙනෙක්.ඔබ හැම මොහොතෙම උත්සහ ගන්නේ නරඹන්නාට උපසිරසියට එහා ගිය දැනුමකුත් ලබා දෙන්න.ඇත්තෙන්ම කෙටි කාලයක් තුල subzlk වෙබ් අඩවිය ප්‍රේක්ෂකයන් අතර ජනප්‍රිය වීමට බල පාපු යෝධ පුරුකක් බවට ඔබ පත්ව හමාරයි.subzlk කියූ සැනින් හසිත ප්‍රසාද්ව මතක් වෙන්නේ ඒ නිසයි.ඒ නිසා ඉදිරියටත් subzlk ඉදිරි ගමන ශක්තිමත් කරන්නට ඔබට හැකියාව,ශක්තිය ලැබේවා! ඒ වගේම සහෝදරයා වෙනුවෙන් මේ සලරුව නරඹන බවත් අමතක කරන්නට එපා….ජය ශ්‍රී!!!! 🎉️🎉️🎉️🎊️🎊️🎁🎁

    • Hasitha Prasad

      සෑහෙන කාලෙකින් දැක්කෙ, ලක්ෂාන් . කොහොමද ඉතිං? ප්‍රතිචාරයට බොහොම ස්තූතියි.

  7. Mihira Madushanka

    හසිත අයියා 300 දානකම් බලාගෙන හිටියෙ..
    සබ්ස්.එල්කේ අඩ්වියේ උපසිරැසි පතාක යෝධයා..
    හසිත අයියා ඔයාට හදවතින්ම සුභ පතනව..
    ඉදිරියට ඔයාගෙ සෑම වැඩ කටයුත්තක්ම සාර්ථක වෙන්න කියල.
    ඒ වගේම තව තවත් උපසිරැසි කරන්න ලැබේවා කියල පාර්ථනා කරනව.. ඔයාගෙ කැපකිරීම 300කට සීමා වෙන්නෙ නෑ.
    මොකද උපසිරැසි එක්ක බලන්න ගොඩක් අය පුරුදු වෙලා ඉන්නව. ඒ අය අපිත් එක්ක බැදිලයි ඉන්නෙ. අනිත් අය ගැන හිතල යමක් කරන මිනිස්සුන්ට හරි නොයන්න පුළුවන් එත් වරදින්නෙ කලාතුරකින් .ජය වේවා..

  8. SubzLK වෙබ් අඩවියේ ඉන්න උපසිරැසි Godfather ‘හසිත’ සහෝ😍 තනි පුද්ගලයෙක් උපසිරැසි 300ක් කරනවා කියන්නෙ ලේසි වැඩක් නෙවෙයි. වැඩ රාජකාරි දහසක් මැද්දෙ මෙවැනි සමාජ සේවයක් වෙනුවෙන් කාලය වැය කරන එක ගැන ඇඩ්මින් කෙනෙක් විදියට නෙවෙයි හසිත සහෝගෙ ප්‍රේක්ෂකයෙක් විදියට හදවතින්ම ස්තූතියි වන්ත වෙන්න ඕන. ඔය අතින් පරිවර්තනය කරපු උපසිරැසි නිසා කී දෙනෙක්ට නම් කිසිම Language Barrier එකකින් තොරව විශ්ව නිර්මාණ රසවිදින්නට හැකියාව ලැබෙන්න ඇත්ද? ඒ ගැනම හිතලා සතුටු වෙන්න පුලුවන්. භාෂා ගැටළුවක් නොතිබුනත් සිංහලයෙක් විදියට අපේ හැගීමෙන් සිංහල උපසිරැසි සමග ටෙලි කතා චිත්‍රපට නරඹන ප්‍රේක්ෂක කොටසකුත් ඉන්නවා. ඒ හැමෝම වෙනුවෙන් ස්තූතියි මේ කරන කැපකිරීමට! ❤️

    ගුණාත්මක උපසිරැසිකරණයේ SubzLK සංකේතය හසිත ප්‍රසාද් කියලා කට ඇරලා මට ඕන තැනක කියන්න පුලුවන්. ඒ වගේම තමයි ලිපි ලියන්න ගියාමත් සහිත්‍යධරයෙක් වගේ කියවන්න ආස හිතෙන විදියට ලියනවා. නැවත වරක් ස්තූතියි මේ හැමදේටම සහා වෙබ් අඩවිය වෙනුවෙන් ලබා දෙන දායකත්වයට!

    300 ආශිර්වාදයක් කරගෙන 400ක්, 500ක්, නෙවෙයි අපේ ආයුෂත් අරගෙන ඉදිරි කාලයක් පුරාවට තව තවත් දහස් ගණන් සිංහල උපසිරැසි සහෘද ප්‍රේක්ෂකයාට දායාද කරන්න හැකියාව ලැබෙන්න කියලා වගේම ජීවිතේ හැම අරමුණක්ම බලාපොරොත්තුවක්ම සිතූ පැතූ අයුරින් සාර්ථක වෙන්න කියලා හිත පතුලෙන්ම සුබ පතනවා! ❤️

    • Hasitha Prasad

      බොහොම ස්තූතියි, සමීර ලිපි ලියන්නනං ඉගෙනගත්තෙම සබ්ස් එල් කේ එකට ලිපි ලියලමයි. මගෙ මුල් උපසිරැසිවල ලිපි බැලුවොත් තේරෙයි තත්වෙ 😂

  9. නියමයි….සබ් එකට තැන්ක්ස්….
    300 වෙනි උපසිරසියට සුබ පැතුම්!
    දිගටම සබ් කරමු….

  10. Ashan Vimukthi Perera

    wow. congratulation bro! jaya wewa! sub ekata thanks!

  11. Ravi Hydra

    300 ට සුබ පැතුම් අයියා. තව තවත් සබ් කරන්න හැකියාව ලැබෙන්න ඕන අපි වගේ ඉංග්‍රීසි කදුලක් බැරි අය වෙනුවෙන්.

    • Hasitha Prasad

      බොහොම ස්තූතියි, රවී . බෑයි කියල දෙයක් නෑ, සිංහල උපසිරැසි එක්ක බැලුවට කමක් නෑ, ඒ එක්කම ඉංග්‍රීසි උපසිරැසි එක්කත් බලන්න පුරුදුවෙන්න. භාෂාව කනට හුරුවුණාම උපසිරැසි නැතුවම බලන්න පුළුවන් ගාණට එන්න පුළුවන්. අනික පොත්වලට පිටින් ගිහින් භාෂාව දිහා බලන්න හුරුවෙන්න, එතකොට අමාරු නෑ අල්ලගන්න.

  12. Madusha

    300 වෙනි උපසිරැසියට සුබපැතුම් සහෝ.බොහොම ස්තූතියි

  13. ඉෂි ද සිල්වා

    300 වෙනි උපසිරැසියට වගේම සුබ පැතුම්!බොහොම ස්තුතියි.

  14. Hashan M. Priyadarshana

    බොහොම ස්තුතියි බ්‍රෝ සබ් එකට.. සුබ පතනවා 300වෙනි කඩඉමට 👏📦 දිගටම කරන් යමු 😊
    ජය වේවා.!
    තෙරුවන් සරණයි.!

    • Hasitha Prasad

      බොහොම ස්තූතියි, හෂාන්

    • Mithun

      300වෙනි සබ් එකට සුභපැතුම් සහෝ ..
      Mkvcage සයිට් එක ඩව්න් උන එකට නම් හරිම අප්සට් .මුවි එකක් නිවැරැදිව අප්ලොඩ් කරන දැකපු එකම සයිට් එක හොද දෙකටම තමා කෙ***නෙ..
      _______________________
      මෙ ස්පයිඩර්මෑන් මුවි එක නම් පට්ට ….❤❤

  15. dilum

    niyami brooo

  16. Mithun

    300වෙනි සබ් එකට සුභපැතුම් සහෝ ..
    Mkvcage සයිට් එක ඩව්න් උන එකට නම් හරිම අප්සට් .මුවි එකක් නිවැරැදිව අප්ලොඩ් කරන දැකපු එකම සයිට් එක හොද දෙකටම තමා කෙ***නෙ..
    _______________________
    මෙ ස්පයිඩර්මෑන් මුවි එක නම් පට්ට ….❤❤

    • Hasitha Prasad

      බොහොම ස්තූතියි, මිතුන් ඔව්, මේ ස්පයිඩර් මෑන් ෆිල්ම් එක හොඳයි මටත් කලින් එකට වඩා. MKVCAGE එකට වෙච්ච දේනං හරිම පාඩුවක් තමයි. ඒකෙ ඕනර්ට නඩු දාල තියෙන්නෙ Hellboy ෆිල්ම් එකේ නිර්මාණකරුවො ( වැඩක් ඇති ෆිල්ම් එකක්නං ඒත් කමක් නෑ 😑) . තව YTS එකටත් නඩු දාල තියෙන්නෙ. දැන් ඉතිං ඩීසන්ට් එකකට තියෙන්නෙ PSARIPS තමයි, තව Watchsomuch කියල එකක් තියනව ඒකත් හොඳයි. නැත්තං 1337x.to පාවිච්චි කරන්න.

  17. ඉසුරු ෂෙහාන් සිරිවර්ධන

    300 වෙනි උපසිරැසියට සුභ පැතුම්,

    ඉදිරියටත් මේ වගේම හොදට වැඩ කටයුතු කරන්න සුභ පතනව,,,,

    ❤❤❤❤❤❤

Leave a Reply

Your email address will not be published. Required fields are marked *