Avengers: Infinity War (2018) Sinhala Subtitle

ආයූබෝවන් අදත් අපේ Subz LK හිතවතුන් හැමදෙනෙක්ටම. අද මේ උපසිරැසි අරගෙන එන්නෙ විශේෂ චිත්‍රපටයකට වගේම මගෙ උපසිරැසි දිවියෙත් විශේෂ අවස්ථාවක් මේ. මොකද හේතුව මේ තමයි මගේ 150 වෙනි උපසිරැසිය. වසර දෙකකට මදක් අඩු කාලයක් තුල මේ කඩයිමට ලඟාවීමට හැකිවීම ගැන ඇත්තටම හිතට ගොඩක් සතුටුයි. ඒක වචනවලට පෙරලන්න බැරි එකක් ඇත්තටම කිව්වොත්. 50 සහ 100 කඩයිම්වලදි මම මම ගැන ගොඩක් දේ කිව්ව නිසා අදත් ඒ ගැන කතාකරන්න මගෙ අදහසක් නෑ. අද මම කතාකරන්න ඉන්නෙ මේ 150 කණුව පිටිපස්සෙ ඉන්න අය ගැන. මුලින්ම කියන්න ඕනෙ වෙනත් උපසිරැසි අඩවියකට සම්බන්ධ නොවී (සම්බන්ධ කර නොගෙන) කෙලින්ම Subz LK වලටම සම්බන්ධ වෙන්න ලැබීම මම ලද භාග්‍යයක් විදියටයි මම සලකන්නෙ. මොකද එහෙම නොවුණනම් මට දමිත් ඇතුළු මේ ඇඩ්මින් මණ්ඩලය එක්කවැඩ කරන්න සහ මේ වගේ විශාල පහසුකම් රැසක් අත්විඳින්නත් තිබුණ අවස්ථාව අහිමිව යන්න ඉඩ තිබුණ. අඩවියට පිවිසෙන ඕගොල්ලන්ටත් පේනව ඇති දවසින් දවස අඩවියේ තත්වය උසස් වෙන විදිය. ඒ ඉතිං තනිකරම දමිත්ගෙ සහ ඇඩ්මින් මණ්ඩලයේ මහන්සිය සහ කැපවීම තමයි. විශේෂම දේ මොන විදියේ අලුත් අංග එකතු කලත් අඩවියේ තියන භාවිතා කිරීමේ පහසුව කියන දේ ටිකකින්වත් අඩුනොවෙන එක. ඊට අමතරව උපසිරැසිකරුවන් වන අපේ පැත්තෙනුත් දමිත් ලබාදීල තියන පහසුකම් මම හිතන්නෙ දේශීය හෝ විදේශීය (Subscene වල පවා) කිසිම අඩවියක නෑ. උදාහරණයක් විදියට උපසිරැසියක් අපටම පළකිරීමේ හැකියාව Subscene වල තිබුණත් ලිපියක් පළකිරීමේ හැකියාවක් ඒකෙ නෑ. ඒත් එක්කම පළකරන ලිපිය සහ ඩවුන්ලෝඩ් ලින්ක් ආදී ඕනෑම දෙයක් අවශ්‍යතාවය මත නැවත වෙනස් කිරීමේ හැකියාවත්, අප කිරීමට සතුටු උපසිරැසියක් ඇත්නම් එය අඩවිය හරහා ස්වයංක්‍රීයව තෝරාගැනීමේ පහසුකමත් උපසිරැසිකරුවන් වන අපටම ලබාදෙන්න ඔවුන් පියවර ගත්තා. වැදගත්ම දේ පහසුකම් රැසක් පිරුණ අන්තර්-අඩවි පණිවිඩ හුවමාරු සේවාවක් සහ පළවන ප්‍රතිචාර එවෙලේම අපට පෙන්වන නොටිෆිකේෂන් තීරුවක්ද මේ පහසුකම් අතර තිබීමයි. මෙතන අපූරුම දේ මේ කිසිම පහසුකමක් අපි ඉල්ලා සිටිය දේ නොව ඔවුන් සිය කැමැත්තෙන්ම අපට ලබාදෙන ඒව වීම. මේ සියලු පහසුකම් නිසාමයි අප කරනා උපසිරැසි ඉතා ඉක්මනින් ඔබ වෙතට ගෙන ඒමටත්, ලැබෙන ප්‍රතිචාරවලට ඉක්මන් ප්‍රති පිලිතුරු දීමටත්, අක්‍රීයවන ඩවුන්ලෝඩ් ලින්ක් ආදිය දැනුම්දීමක් ලැබුණ සැනින් යථා තත්වයට පත්කිරීමට හැකියාව ලැබිල තියෙන්නෙ. ඉතිං දමිත්, කවීෂ, සමීර ඇතුළු ඇඩ්මින් මඩුල්ලේ සියලු දෙනාට හදවතින්ම ස්තූතියි අපට මේ ලබාදෙන ශක්තිය වෙනුවෙන්. ඒ වගේම අලුතින් උපසිරැසිකරණයට එක්වෙන්න කැමැත්තෙන් ඉන්න කෙනෙක් ඉන්නවනම් එකතුවෙන්න කියලත් ආරාධනා කරනව Subz LK එක්ක. මොකද මීට වඩා පහසුකම් තියන, මිත්‍රශීලි ඇඩ්මින් මඩුල්ලක් සිටින උපසිරැසි අඩවියක් වෙන කිසිම තැනක නැති බව විශ්වාසයෙන් කියන්න පුළුවන්. නැත්තං මෙච්චර දුරක් එන්න ලැබෙන්නෙ නෑ මට කීයටවත්. ඊලඟට මතක් කරන්න ඕනෙ හැමදාමත් ප්‍රතිචාරයකින් සහයෝගය දුන් සහ ඉදිරියටත් සහයෝගය දෙන සියලුම දෙනාවත්. නම් වශයෙන් නොකීවත් ඔයගොල්ලන්ගෙන් ලැබෙන පුංචි හෝ ප්‍රතිචාරය තමයි උපසිරැසිකරණයට අපව දිරිගන්වන ඊලඟ වැදගත්ම සාධකය. ඒ එක්කම තව මතක් කරන්න ඕනෙ මගේ මේ උපසිරැසිකරණයට හැකි අයුරින් සහය දෙන මගේ පවුලේ සියලු දෙනාවත්, ටයිප් කරන අතරෙ පරිගණකය ලඟටම එන තේ කෝප්පය පවා ලොකු උදවුවක් වුණා මේ ගමනට. මොකද ලැබෙන විවේකයකදි පැය ගාණක් පරිගණක තිරයක් ඉදිරියට වෙලා යතුරු පුවරුවක් එක්ක ඔට්ටු වෙන එක ඒතරම් පහසු කටයුත්තක් නෙමෙයි. සේරටම වඩා වෙහෙසකර කටයුත්ත ඉංග්‍රීසි දෙබස් හැකිතරම් නිවැරදිව පරිවර්තනය කිරීම. අපේ අසම්පූර්ණ යල්පැනගිය ශබ්දකෝෂ එක්ක මේ කාර්යය තවත් අසීරුයි. සමහර වචනවලට සිංහල අර්ථ හදාගන්න වෙන්නෙ අපිටමයි. අන්තර්ජාලයේ පිහිට නැත්නම් ඉතිං උපසිරැසිකරණය බොහොම නීරස එකක් වෙනව අනිවාර්යයෙන්ම. අවසන් වශයෙන් කියන්න තියෙන්නෙ ඔබ මෙතෙක් කල් අප අඩවිය හා රැඳීසිටිමින් අපට දැක්වූ සහයෝගය ඉදිරියටත් ලබාදෙන්න කියලයි.

එහෙනම් දැන් අපි යමු චිත්‍රපටය පැත්තට…

මම කිව්වනෙ මේක විශේෂ චිත්‍රපටයක් කියල. මේ තමයි කොමික්ස් රසිකයන් ඇස් කන් අයාගෙන බලා සිටි මේ වසරේ මාවල් විශ්මය, නොහොත් Avengers: Infinity War තවත් වචනයකින් කිව්වොත් අනන්ත පාෂාණ සංග්‍රාමය. මේ වනවිටත් ලෝකය පුරා අති දැවැන්ත ආදායමක් ලබමින්, IMDB සිනමා දර්ශකයේ 9.0ක් වැනි ඉහලම අගයක් ලබා එහි හොඳම චිත්‍රපට 250 ලැයිස්තුවේ 10වන ස්ථානයත් තමන් සතුකරගෙන සිටින මේ මාවල් විශ්මය Rotten Tomatos වෙතින් ලබා ඇති අගය 84%ක්. ඊට අමතරව ගූගල් පරිශීලකයන් 96%කගේ ප්‍රසාදයත් ලබාගෙන තියනවා මේ වනවිට. මෙහි අධ්‍යක්ෂණ දායකත්වය ඇන්තනි රුසෝ සහ ජෝ රුසෝ හෙවත් රුසෝ සහෝදරයන්ගෙන්. රංගනයෙන් දායක වෙන්නෙ සුපුරුදු පරිදි Robert Downey Jr. (අයන් මෑන්/ ටෝනි ස්ටාක්), Chris Hemsworth (තෝර්), Mark Ruffalo (හල්ක්/ බෲස් බැනර්), Chris Evans (කැප්ටන් ඇමරිකා/ ස්ටීව් රොජර්ස්), Scarlett Johansson (නතාෂා රමනොෆ්/බ්ලැක් විඩෝ), Benedict Cumberbatch (ඩොක්ට.ස්ට්‍රේන්ජ්), Don Cheadle (වෝ මැෂින්), Tom Holland (පීටර් පාකර්/ස්පයිඩර් මෑන්), Chadwick Boseman (බ්ලැක් පැන්තර්), Tom Hiddleston (ලෝකි), Zoe Saldana (ගැමෝරා), Karen Gillan (නෙබියුලා), Paul Bettany (විෂන්), Chris Pratt (පීටර් ක්විල්/ ස්ටා-ලෝඩ්), Dave Bautista (ඩ්‍රැක්ස්), Josh Brolin (තානෝස්), Vin Diesel (ගෲට්-හඬ), Bradley Cooper (රොකට්-හඬ) ඇතුළු අපට සුපුරුදු නළුනිලියන් පිරිසක්. Thor: Ragnarok (2017) වගේම මේ චිත්‍රපටයත් ගොඩක්ම හාස්‍ය පැත්තට බර කරල තියනව වගේම හැඟීම්බර අවස්ථාත් ඒ අතරෙම සාර්ථකව ඉදිරිපත් කරල තියනව. කොහොමහරි ස්පයිඩර් මෑන්ට පණපොවන Tom Hollandටනම් පොඩි දඬුවමක් දෙන්න අධ්‍යක්ෂක දෙපල තීරණය කරල තියනව. ඒ තමයි ඔහුට තිර පිටපත කියවීම තහනම් කිරීම.  ඒකට හේතුව Spider-Man: Homecoming (2017) තිරගත වෙන්න පෙර එහි තිර පිටපතේ කතාවේ රහස් ඕනෑවට වැඩියෙන් හෙලිකර අසුවීම. ඒ වගේම කැප්ටන් ඇමරිකාව අලුත් පෙනුමකින් දැකගන්නත් පුළුවන්. ඒ විතරක් නෙමෙයි ගාඩියන්ස් ඔෆ් ගැලක්සි පිරිවර ඇවෙන්ජර්ස්ල මුණ ගැහෙන පළමු අවස්ථාවත් මෙය වනු ඇති. තෝර් රැග්නරොක් හීදී කරණවෑමි චරිතයකට පණපොවපු ස්ටෑන් ලී සුපුරුදු පරිදි මේ වතාවෙත් තවත් අපූරු කැමියෝ එකකින් දැකගන්න පුළුවන්. එසේම විනාඩි 156ක ධාවන කාලයකින් යුත් මෙය තමයි මාවල් සිනමා විශ්වයේ දීර්ඝතම චිත්‍රපටය ඒ විනාඩි 147ක ධාවන කාලයක් තිබූ Captain America : Civil War වලින් පසුව.

දැන් අපි යමු කතාව පැත්තට…

ඔයගොල්ලන්ට මතක ඇතිනෙ Thor: Ragnarok (2017) චිත්‍රපටයෙ අවසානය. සතාර් අතින් ඇස්ගාඩය සහමුලින්ම විනාශ වුණාට පස්සෙ එයින් දිවිගලවාගත් ඇස්ගාඩ වැසියන්ව තෝර් විසින් යානයක දමාගෙන අරගෙන යනවා ආරක්ෂිත ස්ථානයක් (පෘතුවිය) කරා. ඔඩිනුත් මිය ගිහින් නිසා තෝර් තමයි නව ජනතාවගේ රජු. එහි පෝස්ට් ක්‍රෙඩිට් දර්ශනයකදී අපි දැක්ක තෝර් සහ ලෝකි දෙන්න සාකච්ජාවක ඉන්නව. හැබැයි ඔයගොල්ලන්ට මතක ඇති ඒ සාකච්ජාවට බාධා වුනා. ඔවුන් ගමන්කල යානය ඉදිරියට තවත් අති දැවැන්ත යානාවක් පැමිණීම නිසා. ඒක අයිති කාටද කියල පෙන්නන්න කලින්  දර්ශනය අවසන් වුණත් අපි හැමෝම තේරුම්ගත්තනෙ යානෙ කාගෙද කියල. වෙන කාගෙද තානෝස්ගෙනෙ. ඒ වගේ දැවැන්ත යුධ යානයකට අසුවුණ තෝර්ගෙ යානයට  මොනවගේ දෙයක් වෙන්න ඇතිද? අන්න එතනින් තමයි මේ Infinity War ආරම්භ වෙන්නෙ. එතනින් එහාට කියල ඔයගොල්ලන්ගෙ රසවින්දනයට බාධා කරන්නෙ නෑ මම. එහෙනම් ගිහින් එන්නම් හමුවෙමු තවත් උපසිරැසියකින් ලඟදිම. මතක ඇතිව  පහලින් තියන ටිකත් කියවන්න.

පිටපත :-

• Bluray පිටපත් සඳහා යාවත්කාලීන කර ඇති අතර උපසිරැසි ගොණුව තුල WEB-DL පිටපතට සැකසූ උපසිරැසියද ඇතුලත්ය.
• ඉහලින් ඇති බාගතකිරීම් ලින්ක් එක WEB-DL පිටපත සඳහාවන අතර ඊට පහලින් ඇති ලින්ක් එක BluRay සඳහා වේ.

විශේෂ :-

• මෙහි තියෙන්නෙ පෝස්ට් ක්‍රෙඩිට් දර්ශනයක් විතරයි. Iron Man 3 (2013) චිත්‍රපටයෙන් පස්සෙ ප්‍රථම වතාවටයි එහෙම වෙන්නෙ.
• ඔයගොල්ලන්ට දකින්න ලැබෙයි මාවල් ස්ටුඩියෝස් ලාංජනයෙ “io” අකුරු දෙක 10 විදියට පේන්න හයිලයිට් වෙනවා. ඒ මාවල් සිනමා විශ්වයේ දසවන වර්ෂ පූර්ණය  සිහිවෙන්නයි.
• මේකෙදි පීටර් ක්විල් තානෝස්ව හඳුන්වන්නෙ ගැමෝරගෙ බාප්පා කියලයි. හැබැයි ඇත්තටම තානෝස් ගැමෝරව හදාවඩාගත් කෙනා විතරයි.
• ගාඩියන්ස් ඔෆ් ගැලක්සිවලදි ගැමෝරව හඳුන්වන්නෙ ඇගේ කුලකයේ අවසන් ජීවියා කියලයි. හැබැයි මේකෙදි ඒක වෙනස් වෙනවා.
• ඩොක්ට.ස්ට්‍රේන්ජ්ට තමන්ගෙ ප්‍රධානම හැකියාවක් භාවිතා කරන්න අමතක වෙනව අවශ්‍යම වෙලාවලදි.
• Footloose (1984), මේ චිත්‍රපටයේ ප්‍රධාන චරිතය නිරූපණය කලේ කෙවින් බේකන්. මැන්ටිස් මේ නම සඳහන් කරනව එක් වතාවක්. 80 දශකයේ එකක් නිසා බොහෝවිට ඒක ගැන මැන්ටිස්ට කියන්න ඇත්තෙ පීටර් වෙන්න ඕනෙ. පස්සෙ ඒක හරියටම තහවුරු වෙනව.
• මතකද රැග්නරොක් එකේදි ඔඩින්ගෙ සේප්පුව තුල තිබූ ටෙසරැක්ටය දිහා ලෝකි අමුතු බැල්මක් දාගෙන යනවා. ඒකට මොකද වුණේ කියලත් බලාගන්න පුළුවන් මේ චිත්‍රපටයෙන්.
• මතකද රැග්නරොක් එකේදි හෙලා සහ ස්කර්ජ් ඔඩින්ගේ සේප්පුවෙ ඇවිදිද්දි ලෝහ අත්වැස්ම දකින හෙලා කිව්ව දේ, ” ව්‍යාජ එකක්”. ඒක හරි කියල තේරෙනව මේකෙදි.
• පීටර් පාකර්ගෙ ස්පයිඩර් සංවේදනය පළමු වතාවට දකින්න පුළුවන් මේකෙදි.
• ටෝනි එබනි මාව්ට “ස්ක්විඩ්වර්ඩ්” කියල කියනව. මේ තමයි ස්ක්විඩ්වර්ඩ්.
• 80 දශකයෙ දේවල් අඩුනැතුව තියනවනෙ පීටර් ක්විල් ඉන්න තැන. ඔන්න Arcade Defender ඉලෙක්ට්‍රොනික් ගේම් එකත් තියනව මේකෙ.
• Grimace (ග්‍රිමේස්), මේකත් 80 දශකය හා සම්බන්ධයි. මැක්ඩොනල්ඩ්ස් ආහාර ජාලය ඒ කාලෙ ප්‍රචාරණයට යොදාගත් චරිතයක්.
• මේ වගේ තවත් Easter Eggs සහ Callbacks විශාල ප්‍රමාණයක් තියනවා චිත්‍රපටය තුල. මේ දැම්මෙ එයින් ටිකක් විතරයි. සමහර ඒව දැම්මොත් රසවින්දනයට බාධාවක් වෙනව.